Цөм хөтөлбөрийн хэрэгжилтийн судалгааны тайлан гарсан бөгөөд энэ талаар Боловсрол, соёл, шинжлэх ухаан, спортын сайд Ё.Баатарбилэг өөрийн байр сууриа илэрхийлсэн юм.

2013 оноос ерөнхий боловсролын сургуульд Цөм хөтөлбөрийг хэрэгжүүлэхээр болсон. Тэгвэл уг хөтөлбөрийн хэрэгжилтийн судалгааны тайлан гарсан байна. Уг тайлангаар хөтөлбөрийн хэрэгжилт хангалтгүй хэмээн дүгнэсэн. Сайдын тушаалаар бүх аймаг, нийслэлийн багш нарын төлөөллийг авчран Цөм хөтөлбөрийн үндэсний багаар судалгаа хийлгэсэн.

Судалгааны дүнгээс ерөнхий боловсролын сургуулийн ахлах ангийн сурагчдын өдрийн ачаалал 16 цаг буюу цаана нь найман цаг үлдэж байгааг тогтоосон. Багш нарын хичээлийн зааж байгаа цаг нь олон улсын дунджаар байгаа мөртлөө нийт хичээл зааж байгаа цагийн 37 хувийг хичээл заах ажилдаа зарцуулаад 63 хувийг өөр бусад төрлийн цаас бичиг баримт боловсруулах ажилд зарцуулагдаж байна. Жишээлбэл, сумын Засаг даргынхаа илтгэлийг бэлтгэх, боловсролын даргынхаа илтгэлийн алдааг засах, сум, аймаг, нийслэлд хэрэгжиж байгаа “Багш”, “Математик”, “Эх оронч” гэх мэт 419 ажил, хөтөлбөрүүдийг жагсаан бичжээ. Багш нарын хувьд хичээлээс гадуур 419 төрлийн ажлуудад цагаа зарцуулдаг гэсэн байна. Тэд олон улсын стандартаар бол 85 хувийг нь хичээл заахдаа зарцуулаад үлдсэн 15 хувьд хичээлээс гадуурх хөгжих, бичиг цаасны ажилд зарцуулах байтал манай улсад урвуугийн урвуу байгаа юм.

Цөм хөтөлбөрийг шинэчлэх гээд байгаа юм биш агуулгын давхцалыг өөрчлөн, засаж сайжруулна

Иймд энэ асуудалд Боловсролын хүрээлэнгээс ажиллаж байна. Нэгдүгээр ангийн хүүхдүүдийн хувьд бага хичээл орж байгаа ч хичээлийн агуулгын хувьд насанд нь ахадсан агуулгатай хичээл зааж байна гэж үзсэн. Хоёр, гуравдугаар анги дээр хичээлийн агуулга хөнгөрөөд зарим анги дээр хүндрэх жишээний байгаа юм. Ялангуяа есдүгээр ангийн химийн хичээлийн агуулгыг байж боломгүйгээр чихсэн байсан. Сурагчдын хувьд яагаад ч уг хичээлийн агуулгыг бүрэн ойлгох боломжгүй. Нэгдүгээр ангийн хүүхэд гуравдугаар ангид элсэн орох үед сурах сонирхол 20 хувиар буурсан байсныг тогтоосон.

Цөм хөтөлбөрийг шинэчлэх гээд байгаа юм биш агуулгын давхцалыг өөрчлөн, засаж сайжруулна. Өнөөдөр энэ хөтөлбөрийг шинэчиллээ гэвэл дагаад баахан багууд, төсөл хэрэгжинэ, агуулгатай холбогдуулан сурах бичгийн шинэчлэл гээд сурах бичиг хэвлэх болно бидэнд тийм төсөв байхгүй. Одоо байгаа хөтөлбөртөө дүн шинжилгээ хийн, агуулгын давхцалыг арилгаж, сурагч багш нарын ачааллыг багасгах талаар 2019-2020 оны хичээлийн жилд дорвитой өөрчлөлт оруулахаар ажиллаж байна.

---