Монголбанкны ерөнхийлөгчөөр ажиллаж байсан Н.Золжаргалыг гурван үндэслэлээр мөрдөн шалгах ажиллагаа үргэлжилж байгааг АТГ-аас мэдээлсэн. 

 Нэгдүгээрт: Арилжааны банкнуудад Монголбанкны зардал гэж тусгай данс нээж, “Маш -нууц” гэсэн тамга дараад хэдэн тэрбум төгрөг шилжүүлсэн.

АТГ-ын Мөрдөн шалгах хэлтсийн ахлах мөрдөгч, ахлах комиссар Ч.Жаргалбаатар: Монголбанкны захирал асан Н.Золжаргал арилжааны банкинд зээл олгохдоо бага хүүтэй олгосон асуудал тогтоогдоод 2018 оны зургадугаар сард АТГ-аас энэ бол хууль бус шийдвэр болсон байна. Хууль бус зээл олон байгаа учраас энэ асуудлаа эргэж хянаж үзээч ээ гэдэг мөрдөгчийн мэдээллийг хүргүүлсэн. Үүний мэдээллээр Монголбанкнаас ажлын хэсэг байгуулагдаад цаашид энэ асуудлыг шийдвэрлэж байгаа байх" гэлээ. 

Хоёрдугаарт: Австри улс руу мөнгө шилжүүлж, байшин хуралдан авсан гэх хэргээр шалгаж байгаа. Юм. Энэ дагуу Австри улс руу санхүүгийн хамтарсан мөрдөн шалгах ажиллагаа явуулах, холбогдох нотлох баримтыг ирүүлэх хүсэлтээ гаргаад мөрдөн шалгах ажиллагаа явуулах даалгавар хүсэлтээ өгсний үр дүнд АТГ-д тодорхой нотлох баримтууд ирсэн хэмээн АТГ-ын Мөрдөн шалгах хэлтсийн ахлах мөрдөгч, ахлах комиссар Ч.Жаргалбаатар дурдав.

Гуравдугаарт: Хууль зөрчсөн хэлцэл хийсэн хэргээр шалгаж байгаа юм. Уг хэргийн хувьд Н.Золжаргал Монголбанкны ерөнхийлөгчөөр томилогдохоосоо өмнө “Эрдэнэт үйлдвэр”-ийн 49 хувийг худалдаж авсан Худалдаа хөгжлийн банкны захирлуудын нэг байсан учраас “Эрдэнэт үйлдвэр”-ийн 49 хувийг авахад Монголбанкнаас баталгаа гаргасан гэх хардлага ч байдаг.

Энэ ч үүднээс өнгөрсөн долоо хоногт Хууль зүй, дотоод хэргийн сайд Ц.Нямдорж: "Эрдэнэт үйлдвэрийн 49 хувийг худалдаж авахдаа Монголбанкнаас 100 тэрбум төгрөгийг хувийн компани руу шилжүүлсэн. Монголбанк зээл өгдөг газар биш. Монголбанкны хуулиар Засгийн газар болон банкинд зээл өгдөг. Гэтэл хувийн компанид зээл олгосон асуудлыг Прокурор нэг жил хав дараад байна. Прокурорын байгууллагад асуудал их байна шүү" хэмээсэн.

АТГ-аас Н.Золжаргалтай холбоотой дээрх гурван хэргийг энэ оны хоёрдугаар улиралд багтаан шийдвэрлэх болно гэдгээ өнөөдөр хэвлэлийн бага хурлын үеэрээ дурдсан юм.

---