Eрөнхийлөгч асан Ц.Элбэгдоржийн гэрт цагдаагийнхан нэгжлэг хийхэд дэлхийн болон монголын олон арван уран зураг гарч ирж, заримыг нь хурааж авсан үйл явдал энэ долоо хоногийн эхээр болсон. Тэгвэл өнөөдөр Ц.Элбэгдоржийн эхнэрийн дүү Х.Болдбаатар энэ асуудлаар тайлбар хийлээ. Дээрх уран зургууд түүний хобби бөгөөд өөрөө цуглуулсан гэлээ

Х.Болдбаатар "Би уран зургийн хоббитой. Хоёр хүнийг дагаж уран зургийнхаа хоббиг улам гүнзгийрүүлсэн. 1997 онд би бизнес маань жаахан бүтэлгүйтэх үеэр Ерөнхийлөгч Х.Баттулгын жолоочоор ажиллаж эхэлсэн. Зураач найз нартай нь ойр дотно байсан л даа. Гутлыг нь тослоод, бандаашийг нь угааж явлаа. Чингисийн том хөшөө хийсэн зураач н.Эрдэнэбилэг ахтай бүр ойр. Уран бүтээлчидтэй ойрхон өссөн хүний хувьд аяндаа хоббитой болсон.

Х.Баттулга захиралтай ойр байсны хувьд 1999 онд Сити таксигийн захирал болсон. Хувь заяаны тохиолоор хоёр Ерөнхийлөгчтэй ойр байдаг. Зургийн хобби маань үүнтэй холбоотой л доо. Намайг чинь Х.Баттулга "Болдоо боорцог оо" гээл явж байдаг. Сая Ерөнхийлөгчийн тангараг өргөх ёслол дээр нь очтол "Хөөе Болдоо боорцогоо юу байна" гэж байсан. 

Бидний ярилцлага авч байгаа "Чухаг-2" хотхонд миний уран зургаа хадгалдаг үзэсгэлэнгийн танхим ч гэх юм уу галлерей ч гэх юм уу байр байгаа. Нэгжлэгийг энд хийсэн. Ц.Элбэгдоржийн гэрт хийгээгүй л дээ" гэлээ.

-Та их олон зуун үл хөдлөх хөрөнгөтэй юм байна. Энэ бүхэнд хүргэн ахын тань тусламж байгаа юу?

-Би 1988 оноос уран зураг цуглуулж эхэлсэн. 1989 оноос хойш бизнес хийсэн. Их олон юм хийсэн. Барилгын салбарт сүүлийн 10 гаран жил ажиллаж байна. Би мянга гаран айлыг тохилог орон сууцанд оруулсан. Дөрвөн байрыг асрамжийн газраас гарсан хүүхдүүдийг түр хугацаанд амьдрах боломжтой болгож өгсөн. Энэ бүхэн маань намайг овоо хөрөнгөтэй гэж харагдуулдаг.  Х.Баттулга Ерөнхийлөгчтэй цуг ажиллаж байснаасаа би асар их юм сурсан. Найман компанитай 260-аад хүн цалинжуулж ажиллаж байна. Миний төрсөн эгч Ц.Элбэгдоржтой гэр бүл болж 30 гаран жил хамт амьдарч байна.  Яалт ч үгүй энэ хоёр хүнтэй миний амьдрал холбогддог. 

 -Таны уран зургийн цуглуулганаас цагдаагийнхан яагаад хурааж авч явсан юм бэ?

-Би таван төгрөгөөс эхлээд зураг худалдаж авч цуглуулсан. Арвин цуглуулгатай. Зургийг галын аюулаас хол, чийгшилтэй, дотроо модон байранд хадгалах ёстой юм байна л даа. Гэтэл би саяныг болтол нэг харанхуй өрөөнд түмпэнтэй ус тавиад л хадгалдаг байсан. Дундговийн харъяат н.Цэгмид гэж зураач надад санал тавьсан. Судалж байгаад "Дүрслэх урлаг бүтээл цуглуулагчдийн үндэсний нийгэмлэг"-тэй хамтраад би зориулалтын уран зураг хадгалах архивын байрыг барьсан. Тэр дотор нилээн олон зураачдын зураг хадгалагдаж байдаг. Бурхан болсон зураачдын зураг ч бий. Үр хүүхдүүд нь хадгалуулдаг. Солилцоо хийж байсан тохиолдлууд ч бий.

Тухайн үед цагдаагийнхан үзлэг хийхэд ойролцоо зургууд гарсан. Авч явсан. Үнэн. Хэмжээ дамжаа нь таарсан гэх мэт. Зураач нар зургаа 3-4 янз зурдаг. Шалгая, үнэлүүлье гээд авч явсан. 

Цагдаа нар ийм зураг алга болсон гэсэн зураач нарын нэртэй, хэмжээтэй жагсаалт л авчирсан. Тэр олон зураг дундаас эрхбиш 10 зураг гардаг л юм байна. 

-Ц.Элбэгдоржид хэдэн зураг байдаг вэ?

-Хөрөнгө орлогын мэдүүлэг дээрээ 600 зурагтай гэж мэдүүлсэн байна лээ. Хонио мянга хүрэхээр тоолдоггүй гэдэг шиг би өөрийнхөө зургийг бол тоолж мэдэхгүй. Нилээн юм байнаа байна. 

-Их тэнгэрийн ам, Төрийн ордонд өлгөсөн байсан уран зургууд алга болсон. Саяны нэгжлэгийн үеэр алга болсон зургууд гарч ирсэн гэсэн мэдээлэл яваад байна л даа?

-"Их тэнгэр" цогцолбор, "Хатантуул" зочид буудал, "Маршал" цогцолбор гээд байна. Миний хэвлэлээс уншсанаар бол зураачдын байгууллагаас авч явсан зургуудыг тэнд өлгөж гадна дотны зочдод үзүүлдэг юм байна л даа. Хэзээ аваачсан зураг юм, хэзээ алга болсоныг нь би мэдэхгүй. Ц.Элбэгдоржийн гэрт нь аваачиж өлгөсөн юм бол байхгүй. Тэр гурван цогцолборт аваачиж өлгөсөн зургийн бүртгэл тооцоо гэж юм байгаа байлгүй дээ. Цагдаагийн байгууллага үнэн зөвийг нь тогтоох байх. 

Албан ёсоор хэлэхэд бид Их тэнгэрийн амнаас очиж зураг хулгайлаад аваад гарах хүн биш. Би 30 гаран жил бизнес хийж байна. 260 хүн цалинжуулж байна.

-Таниас дахиж тайлбар авсан уу?

-Аваагүй байна.

---