Монголчууд бидний гадны соёлоос суралцаж, даган мөрддөг үйлдлүүдэд сайн нь ч бий, саар нь ч бий гэдгийг мартаж болохгүй. Нэн ялангуяа улс орны ирээдүй болсон нялх үрсээ өсгөж хүмүүжүүлэхдээ аюулгүй, эрүүл байдлыг эрхэмлэх нь зүйтэй. Хөлд оруулагч гэдэг манайхны дунд саяхнаас л нэвтэрсэн хэрэглээ болов уу. Тэгвэл АНУ-д хөлд оруулагчаас болж жил бүр 9,000 хүүхэд бэртдэг гэдгийг “Хүүхэд эмнэл зүй” сэтгүүлд нийтэлсэн байна. 1990-2014 оны хооронд 230,676 хүүхэд хөлд оруулагчаас болж бэртсэн гэжээ. Эдгээр хүүхдүүдийн 90 гаруй хувь нь толгой, хүзүүгээ бэртээсэн бөгөөд 74 хувь нь шатнаас унаж бэртэл авсан байна. Үлдсэн нь хөлд оруулагчаасаа унах, ямар нэг зүйлд хүрэх гэж байгаад өөрийгөө гэмтээсэн гэж сэтгүүлд бичжээ.

Тиймээс Америкийн Хүүхэд эмнэл зүйн академиас нялх хүүхдүүдэд дугуйтай хөлд оруулагч хэрэглэхгүй байхыг уриалж байна. Ихэнх эцэг эхчүүд хүүхдүүдээ саатуулах, хөгжүүлэхэд хөлд оруулагч тустай гэж боддог. Гэтэл энэ нь саатуулагч биш сааруулагч болдог хэмээжээ. Америкаас гадна Канад зэрэг хэд хэдэн улсад хөлд оруулагчийг худалдах, тэр ч бүү хэл үйлдвэрлэхийг хориглосон байна. Тиймээс бид ч бас энэ талаар бодож үзүүштэй.

Эх сурвалж: www.cnn.com

 

---