Солонгосын хамгийн шилдэг сэтгүүлч удирдагчдынхаа уулзалтыг Монгол ёс заншлаар жишин мэдээллээ

 

Өчигдөр Солонгосын хамгийн шилдэг сэтгүүлч (диктор) Сун Сог Хи телевизийн мэдээгээ эхлүүлэхдээ иш татсан жишээ нь Солонгост амьдардаг монголчуудын сэтгэлийг маш ихээр хөдөлгөлөө. Энэ бол JTBC-ийн мэдээ юм.

Нэрт сэтгүүлч Сун Сог Хи нь мэдээллийн хөтөлбөрийнхээ эхэнд “Монголд хүний хөл дээр гишгэсэн бол гар барих хэрэгтэй. Монголчуудын хувьд хүний хөл дээр гишгэнэ гэдэг маш бүдүүлэг хэрэг бөгөөд маргалдах шалтгааны эх үндэс болдог гэж үздэг. Нүүдэлчин ард түмэн нь хөлийг толгой, зүрхнээсээ ч илүү үздэг бөгөөд хэрвээ та хэн нэгний хөл дээр гишгэсэн бол уучлалт гуйж, баруун гараа сунгах хэрэгтэй. Ингэснээр нөгөө хүн ч таныг уучлан, эвлэж найрамдаж буйгаа илтгэн гар барьдаг байна... Маргааш Хойд ба Өмнөд солонгос дахин гар барина...” хэмээн хөтөлбөрөө эхлүүлжээ. Энэ талаар тус улсад ажиллаж амьдардаг сэтгүүлч Ижилболд онцлон мэдээлсэн юм.

Сэтгүүлч, хөтлөгчийн ур чадвар энэ мэт нарийн мэдрэмж, цаг үеэ олсон донжтой хөтлөлтөөр олон үзэгчийн сэтгэл зүйг байлдан дагуулдаг ажээ. 

Одоо ах дүү Солонгосын төрийн тэргүүнүүдийн хоёр дахь удаагийн дээд хэмжээний уулзалтыг шууд хүлээн авч үзнэ үү. 

Ю. Шүрэнцэцэг

---