Япон улсын иргэд дэлхийд хамгийн өндөр насалдгаараа алдартай. Тус улсын нийт хүн амын 1/3 нь 65-аас дээш насныхан байдаг. Тэтгэвэрт гарсан иргэд эрүүл, аз жаргалтай амьдарч урт наслахад эрх баригчдын зүгээс зохих ёсны тусламж дэмжлэг үзүүлдэг байна.

Японы тэтгэвэрт гарсан иргэд эрүүл бас хөгжилтэй харагддаг. Ингэж өтлөхийн тулд юу ч хийлгүй гэртээ суухын оронд тэд хоёр дахь амьдралаа төлөвлөгөөний дагуу эхлүүлдэг. Насандаа тохирсон шинэ ажил хийх, орон байраа сэлгэх, бусадтай харилцаа холбоо тогтооход илүү нээлттэй болдог аж.

 

 

Мөн бусдад тусалснаар илүү эрч хүчтэй, аз жаргалтай болдог гэж сайн дурын ажил хийдэг тэтгэврийн насныхан ярьжээ. Тэдний аз жаргалтай байдаг бас нэг нууц нь хүүхдүүдтэй ойр байх гэнэ.

Токио хотын захиргаа тэтгэвэрт гарсан иргэдэд зориулсан ажлын байруудыг бий болгожээ. Тухайлбал хүүхдийн цэцэрлэгт л гэхэд ахмадуудад зориулсан цагийн ажлын байр байдаг. Мөн тэтгэвэрт гарсан иргэдэд зориулсан орон сууц, байгууламжуудыг ихээр барих болжээ.

Токиогийн их сургуулийн профессор Хироко Акиямагийн хэлснээр Японы ахмадууд тэтгэвэрт гараад байр сууриа алдахаас эмээдэг тул аль болох идэвхтэй амьдарч нийгэмд байр сууриа эзэлсэн хэвээр үлдэхийг хүсдэг байна.

 

Эх сурвалж: www.bbc.com

 

---