Япон улсын Мэргэжлийн Сүмо бөхийн 69 дэх их аварга Хакухо М.Даваажаргалын сүмогийн ертөнцөд шуугиулдаг амжилтын түүх үргэлжилсээр. "Миягино" дэвжээний их аварга тэрбээр энэ сарын Аки башёгийн найм дахь өдрийн барилдаанд өвдөг сөхрөлгүй давснаар качикоши буюу 50-аас дээш хувийн амжилтаа үзүүлэн “Ёкозүна цолтой 800 давсан бөх” хэмээх шинэ дээд амжилтын эзэн болж түүхэнд бичигдэв.

Хакүхо аваргын Ёкозүна цол хүртсэнээс авсан 800 дахь даваа нь Макүүчид 994, мэргэжлийн сүмод барилдаж эхэлснээс хойших 1088 дахь даваа. Энэ нь өмнө нь ямар ч их аварга хүрч байгаагүй түүхэн амжилт хэмээн зүй ёсоор тооцогдож буй. Хакүхо 44 удаа уналгүй качикоши хийхдээ 31-д нь түрүүлж байв. Сүмогийн багш, мэргэжилтнүүд “Хакүхогийн 800 давааны амжилт”-ыг хэн дахин давтахыг хэлэх боломжгүй хэмээн үнэлцгээсэн байна. Монгол Улсын гавьяат тамирчин, "Изүцү" дэвжээний Ёкозүна Какүрюү М.Ананд долоо дахь удаагаа уналгүй качикоши хийснээр хоёр аварга башёг уналгүй тэргүүлж эхэллээ. 2020 оны 32 дугаар зуны олимп Япон улсын Токио хотод болно. МҮОХ-ноос Токиогийн олимпийн элчээр мэргэжлийн сүмо бөхийн их аварга Хакүхо М.Даваажаргалыг сонгож, өргөмжилсөн. Монголынхоо тамирчдын албан ёсны олимпийн элчээр томилогдож ажиллахаар болсон тэрбээр “Аса аварга бол монгол сүмочдын мөс хаглагч усан онгоц юм. Би бол азтай хүн. Гэхдээ аз хөдөлмөрлөсөн хүнд ирдэг юм. 2020 оны Токиогийн олимп хүртэл зодог тайлахгүйн төлөө зүтгэж байна” хэмээн хэлжээ.

Г.Батцэцэг

 

 

---