Мэдээллийн эх сурвалж “BBC News” агентлаг долоо хоног тутам дэлхий дахинд болох чухал үйл явдлын хураангуйг танилцуулдаг. www.LiveTV.mn сайт шинэ долоо хоногийн эхэнд “BBC News” агентлагийн онцолсон үйл явдлуудыг уншигч танд хүргэж байна. Энэ долоо хоногт дараах дөрвөн үйл явдал дэлхийн нийтийн анхаарлын төвд байх юм.

1. Өмнөд Солонгос улсын Ерөнхийлөгч Мүн Жэ Ин Умард Солонгосын удирдагч Ким Жон Унтай мягмар гаригт Пхеньянд уулзана. Өмнөд Солонгосын төрийн тэргүүн арав гаруй жилийн дараа анх удаа Умардын нийслэл хотод айлчилж байгаа тул түүхэн айлчлал болох юм.

2. Өнөө шөнө Лос Анжелест Эммигийн шагнал гардуулах 70 дахь удаагийн ёслолын арга хэмжээ болно. Америкийн телевизийн салбарын хамгийн том шагнал гардуулах ёслол. Дэлхийд алдартай урлаг соёлын одуудаас авахуулаад нөлөө бүхий улстөрчид цуглана.

3. Европын холбооны удирдагчид Австрийн Салцбург хотод тусгай уулзалт хийнэ. Энэ уулзалтаар Их Британийн Ерөнхий сайд Тереза Мэйд Брекситийн яриа хэлэлцээрт байр сууриа хамгаалах боломж бүрдүүлэх тохиролцоог Европын Холбооны удирдагчидтай хийх нөхцөл бүрднэ.

4. Пуэрто Рико арлын орныг Мариа далайн хар салхи дайран өнгөрснөөс хойш жилийн хугацаа өнгөрчээ. Пуэрто Рикочууд түүхэнд тохиож байгаагүй байгалийн гамшиг гэж үзсэн ч АНУ-ын Ерөнхийлөгч Дональд Трамп сүржигнээд байхаар зүйл болоогүй хэмээн мэдэгдсэн. Хар салхины дараа аралд 100 тэрбум долларын хохирол учирч, 3,000 хүн амиа алдсан боловч АНУ-ын Засгийн газар дахин сэргээх ажилд төдийлөн ач холбогдол өгөхгүй байна гэсэн шүүмжлэлд өртөөд  байгаа.

 

Эх сурвалж: www.bbc.com

Г.Ганчимэг

 

---