Бүгд Найрамдах намаас Аризона мужид сонгогдсон Сенатын гишүүн Марта МакСэлли Америкийн нисэх хүчний ахлах офицерт хүчирхийлүүлсэн тухайгаа ярьсан байна.

Хатагтай МакСэлли нь байлдааны зориулалттай нисэх онгоцны анхны эмэгтэй нисгэгч байхдаа армид хүчирхийлүүлсэн гэжээ.

Сенатч хүчирхийлэлд өртсөнийхөө дараа ичгэвэртэй байдалд орж эмээснээс энэ тухайгаа нуусан байна.

МакСэлли "Би олон жил чимээгүй байсан. Гэхдээ ажил амьдралынхаа сүүлийн жилүүдэд армийнхны дунд шударга бусаар үүрэг хариуцлагаас зугтаж буй байдлыг ажигласан тул би ч бас хохирогч гэдгийг зарим хүмүүст хэлэх хэрэгтэй гэж бодсон. Бусад хохирогчдын адил цэрэг армийн өнөөгийн тогтолцоо намайг олон дахин хүчирхийлж байсан мэт санагддаг" гэж ярьжээ.  

Тэрээр 26 жил АНУ-ын нисэх хүчинд алба хаасан бөгөөд 2010 онд армиас халагдах хүртлээ хурандаа цол хүртэж дэвшсэн байна.

Аризонагийн сенатч МакСэлли бэлгийн хүчирхийллийн хохирогч болсон тухайгаа анх удаа зарлаж байгаа биш.

Өнгөрсөн жил сенатын сонгуульд өрсөлдөж байхдаа "Уол Стрийт Жөрналь"-д ахлах сургуульд 17 настай сурагч байхад нь дасгалжуулагч багшийнхаа дарамт шахалтад орж байснаа хэлж байжээ. 

Үүнээс гадна Америкийн сенатын хэд хэдэн эмэгтэй гишүүд хүчирхийлэлд өртөж байснаа ярьсан.

Энэ мэтчилэн армид алба хаадаг эмэгтэйчүүдийн 10 орчим хувь нь бэлгийн хүчирхийлэлд өртдөг гэсэн судалгаа байна.

 

 

Эх сурвалж: www.bbc.com

---