Жүжигчнээс гадна загвар өмсөгч, телевизийн хөтлөгч, поп дуучин төдийгүй солонгос, франц хэлтэй, Холливудын хэд хэдэн кинонд дүр бүтээсэн Хятадын од Фан Бинбин “Хуанжу гэг” киногоороо манай үзэгчдэд хэдийнэ танил болсон. Түүний орлого 40 сая доллараар үнэлэгдэж, Хятадын цахим сүлжээ Weibo-д 62 сая дагагчтай. Гэтэл ойрын хоёр сарын турш алдарт жүжигчин Фан Бинбин ор сураггүй алга болоод байна. Өнгөрсөн долдугаар сараас хойш олон нийтийн өмнө харагдаагүй бөгөөд хөтлөн явуулдаг цахим хуудаснууд нь ч нам жим болжээ. Саяхнаас Хятадын Засгийн газар жүжигчнийг баривчлан саатуулсан, аль эсвэл хорьж цагдсан байж магадгүй гэсэн цуу яриа шүтэн бишригчдийнх нь дунд гараад байна.

Хэрэг явдлыг эргэн сөхвөл долдугаар сарын 1-ний өдөр жүжигчин Фан Шанхай хотын хүүхдийн эмнэлэгт явж байжээ. Үүнээс хойш жүжигчин өөрөө төдийгүй жүжигчний нэр, зураг нь олон нийтэд хүрээгүй байна. Тэрээр Брюс Уильстэй хамт кинонд тоглосон ч сурталчилгаанаас нэрийг нь хассан байж. Хятадын телевизийн хөтлөгч байсан Куй Енгуан өнгөрсөн тавдугаар сард Weibo цахим сүлжээнд жүжигчин Фаны 2003 онд тоглосон Гар утас киноны гэрээг нийтэлсэн. Гэрээнд 1,6 сая долларын цалин авсан гэж бичсэн байсан ч үнэндээ 7,8 сая доллар авсан гэжээ. Хэрэв энэ үнэн болоод татвараас зайлсхийсэн гэдэг нь нотлогдвол хуулийн дагуу хариуцлага хүлээнэ гэж эх сурвалж бичжээ. Гэсэн ч одоогоор Фан Бинбинийг зөрчил гаргасан гэдгийг албан ёсоор нийтлээгүй байна. Түүнчлэн Германы алдарт “Монтбланк” брэнд өнгөрсөн дөрөвдүгээр сард Хятадын жүжигчинтэй хийсэн гэрээгээ дуусгавар болгосноо “Нью-Йорк таймс” сонинд мэдээлжээ. Одоогоор Хятадын Засгийн газар цуу яриатай холбоотой ямар нэг мэдэгдэл хийгээгүй байна.

Эх сурвалж: www.qz.com

Г.Ганчимэг 

---