2016 оны УИХ-ын сонгуулийн өмнөхөн тухайн үед /2012-2016 онд/ эрх барьж байсан Ардчилсан намын удирдлагууд Монгол-Оросын хамтарсан уулын баяжуулах Эрдэнэт үйлдвэрийн Оросын талын мэдлийн 49 хувийг Монголын талд худалдах шийдвэрийг будлиантуулж, хувийн компанид төрийн мөнгөөр худалдсан гэх "хардлага"-ыг ЗГХЭГ-ын дарга Л.Оюун-Эрдэнэ дэлгэн тавьсан билээ.

2016 оны парламентийн сонгуулиар МАН дийлэнх олонхийн суудал авч засаглалын эрхийг авсан. Тухайн үеийн Ерөнхий сайд Ж.Эрдэнэбат Эрдэнэт үйлдвэрийн 49 хувийг буцаан авах шийдвэрийг гаргаж, уг худалдан авалтын хэргийг захиргааны хэргийн шүүхэд шилжүүлсэн боловч энэ хэрэг дээр Засгийн газар гурвантаа ялагдсан байдаг. Уг ялагдлыг Эрдэнэтийн 49 хувийг өмчлөн авсан талын хийсэн ажил байж магадгүй гэж "хардаж" байгаагаа ч ЗГХЭГ-ын дарга Л.Оюун-Эрдэнэ өнгөрсөн өдрүүдэд хэд хэдэн удаа хэлсэн.

Тэгвэл энэ хэрэгтэй холбогдуулан Худалдаа хөгжлийн банкны ТУЗ-ийн дарга Б.Эрдэнэбилэгийг хууль хяналтын байгууллагаас хэд хэдэн удаа дуудаж байцаалт авахыг хүссэн ч огт ирээгүйгээр үл барам нэг ч удаа байцаалт өгөөгүй аж.

ЗГХЭГ-ын дарга Л.Оюун-Эрдэнэ Эрдэнэтийн 49 хувийг "Монголын зэс" корпорацид худалдсан хэргийг шийдвэрлэсэн гэх тухайн үеийн Засгийн газрын хуралдааны нууцын зэрэглэлтэй протоколыг улсын нууцаас гаргаж ил болгосноор 49 хувийг эзэмшигч талтай томоохон "дайн" эхлүүлсэн билээ.

Үүнтэй холбоотойгоор өнөөдөр Эрүүгийн цагдаагийн албанаас "Монголиа коппер корпорейшн"-ийн ТУЗ-ын дарга М.Мөнхбаатар, гүйцэтгэх захирал Ц.Пүрэвтүвшин, Худалдаа хөгжлийн банкны ТУЗ-ийн дарга Б.Эрдэнэбилэг, гүйцэтгэх захирал О.Орхон нараас байцаалт авсан.

Гэхдээ энд нэг анхаарал татаж байгаа зүйл нь Худалдаа хөгжлийн банкны ТУЗ-ийн дарга Б.Эрдэнэбилэгийг хууль хяналтын байгууллагаас удаа дараа дуудахад ирээгүй учраас албанд ирүүлсэн аж.

Өнгөрсөн хугацаанд хангалттай "нууцлаг" хүн байж чадсан Б.Эрдэнэбилэгийг "тэр хүнийг нэг харчихаад үхэхэд гомдох юм алга" гэж нэгэнтээ Хууль зүйн сайд Ц.Нямдорж хэлж байсан. 

Хууль хяналтынхны өмнө болоод хэвлэлийнхний өмнө өнөөдөр анх удаа гарсан Б.Эрдэнэбилэгийн хувьд Эрдэнэт үйлдвэрийн 49 хувийг худалдан авсан гэх хэргээс гадна олны анхаарал татахуйц хэд хэдэн хэрэгтэй ч холбогдож байгаа аж. 

Энэ тухай мэдээллийг бид эргэн мэдээлэх болно.

---