Дэлхийн агаарын чанарын талаарх мэдээллийг тогтмол дамжуулж мэдээллэдэг олон улсын Greenpeace болон Air Visual байгууллагуудаас шинэ жагсаалт гаргалаа. Агаарын бохирдол хамгийн ихтэй бүс нутаг, хот суурингуудыг өнгөрсөн 2018 оны дүн мэдээгээр жагсаахад Энэтхэг улс толгойлжээ.

Энэтхэг улсын нийслэл Шинэ Дэли хотын захын Гуруграм суурин өнгөрсөн онд агаарын бохирдлоороо тэргүүлсэн байна. Тус хотын агаарын чанарын индексийн PM2.5-ын хэмжээ 2018 оны хоёр сард дарааллан 200-аас дээш гарч, жилийн дундаж нь 135 буюу Америкийн Хүрээлэн буй орчныг хамгаалах газраас аюулгүй гэж тогтоосон хэмжээнээс гурав дахин их байсан гэжээ.

Зөвхөн Гуруграм хотоор Энэтхэг улсын агаарын бохирдлын хэмжээ хязгаарлагдсангүй.  Дэлхийн хамгийн их агаарын бохирдолтой байсан 10 хотын долоо нь тус улсад харьяалагдаж байна.

Агаарын бохирдлоос болж жилд долоон сая ураг эндэх аюултай

Greenpeace төрийн бус, олон улсын байгууллагын гүйцэтгэх захирал Иеб Саногийн хэлснээр ирэх жилд агаарын бохирдлоос болж долоон сая ураг төрж амжилгүй эндэх аюул нүүрлэсэн гэжээ. Агаарын бохирдол хүн төрөлхтний амь нас, ирээдүйг устгаж үгүй хийж байгаагаас гадна асар их хэмжээний эдийн засгийн алдагдалд оруулж байгаа юм. Хөдөлмөрийн зах зээлд 225 тэрбум ам.доллар, эрүүл мэндийн салбарт олон их наяд ам.доллар бидний халааснаас гарч буйг Сано анхааруулжээ.

Тэр дундаа Өмнөд болон Зүүн өмнөд Азийн орнууд агаарын бохирдлын хэмжээгээр дэлхийд толгой цохиж байгаагийн нэг нь Монгол улс юм. Өнөөдрийн агаарын чанарын мэдээгээр гэхэд нийслэл Улаанбаатар хотод PM2.5-ын хэмжээ 279 байгаа нь дэлхийд хоёрдугаарт орж байна.

(дэлхийн агаарын чанарыг мэдээллийг энд дарж харна уу)

https://www.airvisual.com/world-air-quality-ranking

 

 

Пакистан, Энэтхэг, Бангладеш, Хятад зэрэг улс орнууд агаарын бохирдлоор дээгүүрт орсоор байгаа юм. Олон улсын 3,000 хотын 64 хувьд нь агаарын чанарын индекс Дэлхийн эрүүл мэндийн байгууллагын эрүүл мэндэд хоргүй гэж тогтоосон түвшнээс давсан.

Агаарын бохирдлын хэмжээгээр тэргүүлдэг Хятадад 2017-2018 оны хооронд агаарын бохирдол 12 хувиар буурсан ч хөрш Индонези, Өмнөд Солонгос, Вьетнам, Тайланд улсуудад нэмэгджээ.

 

 

Эх сурвалж: www.cnn.com, www.airvisual.com

---