Сар бүр БНСУ-ын хилээр нэвтэрсэн монгол иргэдийн 500 орчим нь хууль бусаар оршин суухаар үлддэг байна. Тиймээс визний материалыг илүү нарийвчлан шалгахаар болжээ. Тодруулбал, виз мэдүүлсэн монгол иргэдийн материалыг
багадаа 50 хоног (ажлын өдөр буюу 10 долоо хоног) болон түүнээс дээш хугацаа зарцуулан шалгах болсныг БНСУ-аас Монгол улсад суугаа Элчин сайдын яамнаас өчигдөр мэдэгдлээ.
Гэхдээ хүндэтгэх шалтгаан буюу эрүүл мэндийн улмаас яаралтай хагалгаанд орох, олон улсын арга хэмжээнд оролцох
зэрэгт яаралтай виз авах хүсэлт гаргах юм байна.
Түүнчлэн сүүлийн үед виз мэдүүлсэн иргэдийн 20-25 хувь нь визний брокеруудаар дамжуулан хуурамч бичиг баримт бүрдүүлэн өгч байгаа аж. Тэр дундаа олон удаагийн виз авч өгөх нэрийдлээр 6-8 сая төгрөг авдаг залилангийн хэрэг
цөөнгүй илэрсэн байна.
Энэ нь БНСУ болон Монгол улсын хуулийг зөрчиж буй хэрэг тул үүнтэй хатуу тэмцэх аж. Ийм тохиолдолд Элчин сайдын яамны зүгээс нэг жилээс дээш хугацаагүйгээр БНСУ нэвтрэх эрхийг хаахаар болжээ.

Сонирхуулахад, манай улсад суугаа БНСУ-ын Элчин сайдын яаманд өдөрт 700-800 иргэн виз мэдүүлдэг байна.

Эх сурвалж: "Үндэсний шуудан" сонин

---