Засгийн газрын 29 тусгай сан өнөөдрийн байдлаар ажилладаг бөгөөд эдгээрт өнгөрсөн онд гурван их наяд гаруй төгрөгийн төсөв баталж байсан бол энэ онд 400 тэрбум төгрөгөөр нэмэгджээ.

Гэвч сангуудын үйл ажиллагаанд тавих хяналт сул зэргээс үүдэн их хэмжээний зөрчил илэрсээр байгаа юм. Сангуудад хийсэн шалгалтаар зөвхөн Тариалан эрхлэлтийг дэмжих сангаас л гэхэд 140 тэрбум төгрөгийн зөрчил илэрчээ. Үүний 47 тэрбумын зөрчил нь тендер зохион байгуулахтай холбоотой бол 72 тэрбум төгрөгийн зээл хугацаа хэтрэлттэй байгаа юм.

Тиймээс тусгай сангуудад шалгалт хийж, шалгалтын дүнд заримыг нь татан буулгаж, заримыг хооронд нь нэгтгэх талаар Сангийн сайд өмнө нь мэдээлж байсан. Тэгвэл уг асуудлыг өнөөдрийн Засгийн газрын хуралдаанаар оруулж гурван санг хооронд нь нэгтэж, долоон санг татан буулгахаар болжээ.  

Ингээд Тариаланг дэмжих сан болон Мал хамгаалах санг Жижиг, дунд үйлдвэрлэлийг хөгжүүлэх санд нэгтгэхээр боллоо.

Үүнтэй холбоотойгоор Тариаланг дэмжих сан, Мал хамгаалах сангаас олгож байгаа урамшууллыг жил бүрийн төсөвт тусган санхүүжүүлэхийг сайд Ч.Улаан, Ч.Хүрэлбаатар нарт даалгажээ.

Харин Үйлдвэрлэлийг хөгжүүлэх сан, Олон улсын хамтын ажиллагааны сан, Монгол судлалыг дэмжих сан, Ирээдүйн тэтгэврийн нөөц сан, Эрсдэлийн сан, Засгийн газрын өрийн баталгааны сан, Агаарын бохирдлын эсрэг санг татан буулгахаар болсон байна.

Түүнчлэн,

-Хөдөлмөр эрхлэлтийг дэмжих сангаас жижиг зээл, санхүүгийн дэмжлэг олгох хэмжээ, хөтөлбөрийг Засгийн газраас тогтоодог байх

-Боловсролын зээлийн сангаас олгосон зээлийн эргэн төлөлтийг сайжруулах, хугацаа хэтэрсэн өр, авлага үүсгэхгүй байх

-Улсын авто замын сангийн хөрөнгийн зарцуулалт, хяналтыг сайжруулах, сангийн орлогын эх үүсвэрийг Төсвийн тухай хуульд нийцүүлэхийг сайд нарт даалгажээ.

Улмаар санхүүгийн дэмжлэг, хөнгөлөлттэй зээл олгодог сан, тусгай сан, төсөл, хөтөлбөрүүдийг Жижиг, дунд үйлдвэрлэлийг хөгжүүлэх сангаар дамжуулж, нэгдсэн удирдлагад оруулж, дүнг танилцуулахыг сайд Ч.Хүрэлбаатар, Ч.Улаан нарт үүрэг болгов.

Төсвийн хөрөнгөөс зээл, тусламж авсан, батлан даалт гаргуулсан, санхүүгийн дэмжлэг авсан этгээдийн мэдээлэл, шалгарсан төслийн нэр, сонгон шалгаруулсан шийдвэр, зээлийн төлөв, үлдэгдэл зэргийг шилэн данс, цахим хуудсаар тогтмол мэдээлэхийг сайд нарт даалгалаа.

Мөн хугацаа хэтэрсэн авлагыг барагдуулах, гэрээний үүргээ биелүүлээгүй бол хуулийн байгууллагаар шалгуулах, төсвийг хохиролгүй болгох, хариуцлага алдсан төрийн албан хаагчид хариуцлага хүлээлгэж байхаар болов. Хугацаа хэтэрсэн зээлийн үлдэгдэлтэй, зээлийн муу түүхтэй бол зээл олгохгүй байх, зээл, санхүүгийн дэмжлэгийг зориулалтын дагуу ашиглаж байгаа эсэхэд иргэд, олон нийтийн оролцоотой хяналт тавьж байх зэргийг үүрэг болголоо хэмээн Засгийн газрын Хэвлэл мэдээллийн албанаас мэдээллээ.

 

---