Дэлхийн хамгийн том кино наадам болох Оскарын шагнал гардуулах 91 дэх удаагийн ёслол өнөөдөр эхэлсэн. Энэ жилийн наадмын хамгийн том онцлог нь хөтлөгчгүй явагдана гэдгээрээ анхаарал татаж байна.

Кино академийн дээд шагнал гардуулах 31 дэхь удаагийн наадам болж байгаатай холбогдуулан үе үеийн Оскарын наадмын үеэр олныг цочирдуулж байсан гэнэтийн дурсамжтай үйл явдлуудыг онцолж байна.

Юун түрүүнд өнөөдөр эхэлж буй 2019 оны Оскарын наадмыг онцолъё. Кино академийн дээд шагнал гардуулах наадмын түүхэнд сүүлийн 30 жилд анх удаа үндсэн хөтлөгчгүй явагдахаараа онцлогтой. Мэдээж наадмын үеэр олон тооны одууд ээлж дараалан гарч ирж, шагналтнуудыг зарладаг уламжлал хэвээрээ үргэлжилнэ. Энэ жил хөтлөгчгүй болсны шалтгаан нь ихээхэн хүлээлт үүсгээд байсан нэрт инээдмийн жүжигчин, элэглэгч Кевин Харт аль 2011 онд бичиж байсан жиргээнээсээ болж, Оскарын наадмыг хөтлөх үүргээсээ албан ёсоор татгалзсантай холбоотой.

Баярлуулан гомдоосон Оскар-2017

2017 оны Оскарын наадмын үеэр хөтлөгч Уоррен Бьюти, Фей Данавей нар оны шилдэг киноны нэрийг La La Land хэмээн андуурч зарлаж байв. La La Land-ын продюсер Жордан Хоровиц тайзан дээр кино багийнхантайгаа баяраа тэмдэглэж байх зуур, жинхэнэ ялагч нь Moonlight кино болж таарч, тайзан дээр инээх ч биш, уйлах ч биш тун сонин үзэгдэл өрнөсөн юмдаг. Ямартай ч, продюсер Жордан Хоровиц тун ч дурамжханаар Moonlight-ыг зарлаж, Холливудын домог Уоррэн Бьютитэй ширүүн харьцсан нь маш эвгүй харагдаж байв. Хожим сонсох нь ээ, хөтлөгчдийн ч буруу биш, наадмын зохион байгуулалтын багийнхан ялагчийн дугтуйг санамсаргүйгээр сольж, алдаа гаргасан байсан.

Тайзны уналт...

2013 оны Оскарын наадмын үеэр Холливудын шилдэг жүжигчин Женнифер Лоуренс оны шилдэг эмэгтэй жүжигчин номинацид ялалт байгуулсныхаа дараа тайз руу гарахдаа бүдэрч унаж, анхаарал татсан. Женнифер тухайн жил Silver Linings Playbook кинонд бүтээсэн дүрээрээ тийнхүү шагнагдаж, Оскарын түүхэн дэх хамгийн залуу хоёр дахь ялагч болж байв. Өдгөө Женнифер Холливудын амьд домог болсон Мерил Стрип, Хелен Миррен нарын залгамж халаа гэгддэг шилдэг жүжигчин болоод байна.

Үнсэлт...

2003 оны Оскарын наадмын үеэр шилдэг эрэгтэй гол дүрийн жүжигчин шагналд ялалт байгуулсан Адриен Броди шагналаа гардахдаа Холливудын сайхан бүсгүй Халли Берриг үнссэн нь шуугиан дагуулсан. Төгөлдөр хуурч киногоороо Оскар хүртсэн Броди сэтгэл хөдлөлөө барьж дийлээгүй учраас тийм алхам хийсэн хэмээн хожим тайлбарласан.

Үнсэлт гэснээс Холливудын нэрт жүжигчин Анжелина Жоли нь 2000 оны Оскарын наадмын үеэр өөрийн төрсөн дүү Жеймстэй үнсэлцсэн явдал бий. Тэрбээр энэ талаараа тайлбарлахдаа шилдэг туслах эмэгтэй дүрийн шагнал хүртээд хязгааргүй баярласан байсан, мөн дүүдээ хязгааргүй хайртай учраас гэж байжээ.

12 минутын турш үргэлжилсэн алга ташилт...

Инээдмийн киноны нэрт мастер Чарли Чаплинд танхим дүүрэн хүмүүс бүхэл бүтэн 12 минутын турш босч, алга ташин хүндэтгэл илэрхийлсэн түүх бий. 1972 оны Оскарын наадамд Чарли Чаплин АНУ-д эргэж ирснээсээ хойш анх удаа оролцсон нь тэр байжээ. Ямар ч том наадмын түүхэнд хэн нэгэнд 2,3 минутаас дээш хугацаанд бүгдээрээ босч зогсон хүндэтгэл илэрхийлсэн тохиолдол байдаггүй.

Эх сурвалж: FB Jagaa Damdin

---