Тээврийн хэрэгсэл жолоодож яваа жолооч болон зорчигчид хамгаалах бүсээ зүүснээр зам тээврийн ноцтой ослыг 50 хувь бууруулдаг гэсэн судалгаа бий. 

Хэдийгээр манай улсад  “Замын хөдөлгөөний аюулгүй байдлын тухай” хууль хэрэгжиж эхэлснээр энэ тоо өөрчлөгдөж жолооч болон жолоочийн хажууд сууж буй зорчигчдын 90 гаруй хувь нь хамгаалах бүсээ зүүдэг болсон ч сүүлийн үед хамгаалах бүсний хэрэглээний хэвшил алдагдах, хүүхдийг зориулалтын суудалд тээвэрлэхгүй байх зөрчлүүд гарсаар байгаа юм.

Тиймээс зам тээврийн ослыг бууруулах зорилгоор хэрэгжүүлсэн "Хамгаалах бүс, хамгаалах малгайн хэрэглээг сайжруулах" төслийн үр дүнгийн судалгааг Тээврийн цагдаагийн албанаас зохион байгуулж байгаа ажээ.

Судалгааг нийслэл хотын хэмжээнд 10 цэгт зохион байгуулах ба жолооч, зорчигчдын хамгаалах бүсний хэрэглээний түвшин, хүүхдийн аюулгүй тээвэрлэлт, хамгаалалтын суудлын хэрэглээний чиглэлээр хийгдэх юм байна.

---