Венесуэл улсад инфляцийн түвшин огцом нэмэгдсэнээр эдийн засгийн байдал хүндэрч, мөнгөн тэмдэгт үнэгүйдсэнээр хүнс, эм бэлдмэлийн хомсдолд орсон гэж өрнөдийн хэвлэлүүд мэдээлсээр ирсэн. Колумбын хилээр дамжиж олон улсын хүнс тэжээлийн тусламж хүргэхээр болсон ч замуудад хаалт тавьж тусламжийн цувааг оруулахаас татгалзсан юм.

Хэдийгээр ард иргэд нь өлсөж байгаа ч Венесуэл улсын Засгийн газар хөрш Колумбад өлсгөлөнд нэрвэгдсэн хүүхдүүдэд хүнс тэжээлийн тусламж үзүүлэхээр болжээ. Энэ тухай Венесуэлийн Холбоо харилцааны сайд Хорхе Родригез мэдээлсэн байна.

Түүний мэдэгдсэнээр 20,000 хайрцагтай хүнс тэжээлийн тусламжийг Колумбын хилийн хот Кукута руу илгээх юм. Кукута хот нь Венесуэл рүү хүргэх олон улсын тусламжийн барааг төвлөрүүлэх гол цэг төдийгүй нөгөө талаар Венесуэлээс дүрвэж гарсан иргэдийн байрлах эхний зогсоол болдог.

 

 

Венесуэлийн сөрөг хүчний удирдагч Хуан Гуаидо өөрийгөө түр хугацаанд үүрэг гүйцэтгэх Ерөнхийлөгчөөр нэрлэж олон улсын холбоо байгууллагуудаас хүнс тэжээлийн тусламж хүссэн. Венесуэлийн нийгмийн нөхцөл байдлыг ойроос хянадаг их сургуулийн судалгааны багийн мэдээлснээр 2017 онд ард түмний 90 хувь нь ядуу буурай амьдарч байна гэжээ.

Иргэдийн дунд “Мадурогийн хоолны дэглэм” гэсэн нэр томъёо бий болсны учир нь оршин суугчид дунджаар 11 кг турсан гэх судалгаанаас үүдэлтэй юм. 2018 оны 11 дүгээр сарын байдлаар АНУ Венесуэлд 9,8 сая ам.долларын хүнсний тусламж үзүүлжээ.

 

 

Эх сурвалж: www.cnn.com

---