Ц.Даваасамбуу

БНСУ-ын Засгийн газар Инчеон болон Улаанбаатар хотын чиглэлд нислэг үйлдэх эрхийг агаарын тээврийн “Asiana” тэргүүтэй аль нэг компанид олгохоор төлөвлөж буйтай холбогдуулан “Korean Air” компани энэ чиглэлд монопол байдлаа алдахаар байгаа талаар http://www. koreatimes.co.kr сайтад нийтэлжээ. Тус сайтад нийтэлснээр Инчеон-Улаанбаатарын чиглэлд нислэг үйлдэх эрхийн төлөө агаарын тээврийн “Asiana”, “Jeju”, “T’way” болон “Eastar” компани өрсөлдөж байгаа бөгөөд БНСУ-ын Газар, дэд бүтэц, тээврийн яам шинэ лицензийг энэ сард олгохоор төлөвлөж байгаа аж. 

“Кoreatimes” “Хоёр орны агаарын тээврийн үйлчилгээг тус бүр нэг компани хангах тухай 1991 онд байгуулсан хэлэлцээрийн дагуу дээрх чиглэлд “Korean Air” компани 30 орчим жилийн турш монопол байдлаа хадгалсаар ирсэн. Монголын талаас агаарын тээврийн “MIAT” компани Инчеон хот руу нислэг үйлддэг билээ. Дээрх хоёр компанийн монополчлолын улмаас энэ чиглэлийн нислэгийн тийзийн үнэ бусад нислэгүүдтэй харьцуулахад хэтэрхий үнэтэй байдгийн зэрэгцээ суудлын тоо хүрэлцээгүй байдаг гэх шүүмжлэл газар авах болсон юм” хэмээжээ.

БНСУ-ын Газар, дэд бүтэц, тээврийн яамны мэдэгдэлд тэмдэглэснээр, “MIAT” болон “Korean Air” компани нь өнгөрсөн сард хэлэлцээрээ шинэчилсэн хэдий ч таагүй нөхцөл байдал үргэлжлэх төлөвтэй байгаа ажээ. Солонгосын талаас энэ чиглэлийн нислэг үйлдэх компанийг хоёр болгож, долоо хоногт үйлдэх нислэгийн тоог нэмэгдүүлэн ес болгохоор төлөвлөж буй нь одоогийн нислэгийг 50 орчим хувиар нэмэгдүүлэх юм. Тус яамны төлөөлөгч “Энэхүү шийдвэр нь Инчеон-Улаанбаатарын чиглэлийн гол оператор болох “Korean Air” компанийн статуст нөлөөлөхгүй бөгөөд агаарын тээврийн өөр нэгэн компанид нислэг үйлдэх эрхийг олгох боловч “Korean Air” компани нислэгүүдээ хэвийн үргэлжлүүлнэ” гэж мэдээлжээ.

“Korean Air” компанийн үйлдэж буй нислэгийн суудлын тоо хязгаарлагдмал байдгийн улмаас тийзийн үнэ баярын үеэр нэг сая вон /890 ам.доллар/ давдаг нь нислэгийн хугацаа нь дөрвөн цаг үргэлжилдэг бусад хотын нислэгийн тийзийн үнээс хоёр дахин өндөр үнэ юм. “Нислэгийн тоо нэмэгдсэнээр тийзийн үнэ хямдарч, илүү олон жуулчин аялах боломжийг нээнэ” гэж салбарын төлөөлөгчид үзэж байна. Газар, дэд бүтэц, тээврийн яамны мэдэгдэлд тэмдэглэснээр, өнгөрсөн онд Инчеон-Улаанбаатарын чиглэлд 330 мянган хүн зорчсон бөгөөд Монгол Улсыг сонирхон аялах жуулчдын тоо нэмэгдэж буйтай холбоотойгоор зорчигчдын тоо жилд дунджаар 11 хувиар өсөхөөр байгаа аж.

---