2016 онд Татварын багц хуулийг шинэчлэн найруулж УИХ-д өргөн барьсан байдаг. Гэвч түүнээс хойш улс төрийн нөхцөл, шалтгааны улмаас уг хуулийн төслийг хэлэлцэхгүй байсаар өнөөдрийг хүрсэн юм. Тэгвэл өнөөдөр Татварын багц хуулийн хэлэлцүүлэг боллоо.

Татварын багц хуулийн шинэчилсэн найруулгын хүрээнд Татварын ерөнхий хууль, Аж ахуйн нэгжийн орлогын албан татварын тухай хууль, Хувь хүний орлогын албан татварын тухай хуульд өөрчлөлт оруулах бөгөөд хуулийг хэрэгжүүлэхэд 29 хуульд нэмэлт өөрчлөлт оруулж, 45 дүрэм журмыг батлах юм. 

Улсын хэмжээнд татвар төлөгч 191 мянган аж ахуйн нэгж байгаагааас 95,9 хувийг бичил, жижиг аж ахуйн нэгж эзэлдэг байна. Татварын багц хуулийн шинэчлэлийн хүрээнд эдгээр аж ахуйн нэгжүүдийн хөрөнгө оруулалт бизнесийн орчныг дэмжих аж.

Тухайлбал, Жилийн борлуулалтын орлого нь 1,5 тэрбум төгрөгөөс бага бол төсөвт төлсөн татварын 90 хувийг буцаан авдаг болох юм байна. Мөн илүү төлсөн татварыг буцаан олгодог болох зохицуулалт ч оруулжээ.

Энэхүү татварын багц хуулийн асуудлаар МҮХАҮТ-ын дарга, Эдийн засагч Б.Лхагважаваас зарим зүйлийг тодрууллаа.

Б.Лхагважав:

2015 онд Эдийн засгийн ил тод байдлыг дэмжих тухай хууль гарснаар 17 мянган компани 36 их наяд төгрөг буюу 17 тэрбум доллартай тэнцэх хэмжээний ажил үйлчилгээ ил болсон.

Тэгвэл, одоо Татварын багц хуулийн систем батлагдвал иргэн ААН татвараа нуудаггүй, сайн дурын үндсэн дээр татвараа төлдөг, татвараа төлсөн иргэн, ААН нь зах зээлийнхээ эзэн болох юм.  Түүнийг нь ч төр бүх талаар дэмждэг болно.2016 онд 1700 касс л НӨАТ бичиж байсан бол одоо 100 мянга болж өссөн. Одоо өргөтгөл 150 мянган цэг дээр хийсэн.

Харин Татварын багц хуулийг батлахгүй гурван жил дамналаа. Одоо яаралтай батлах шаардлагатай. Яагаад гэвэл манай эдийн засаг 2021 онд   хоёр дахин тэлнэ. Эдийн засгийн тэлэлтийн энэ үед энэ хууль зарцуулагдах ёстой. Манай эдийн засаг 10 тэрбум биш. Зөвхөн НӨАТ-ын 402 сая тасалбарын ард 60 гаруй их наяд төгрөг  тэмдэглэгдсэн. Үүнийгээ зөвөөр бүртгэж чадвал зөв макро эдийн засгийн бодлого гарна.

 

---