#Цэвэрхэншинэлцгээе гэх уриалгыг Сүхбаатар аймгийн Байгаль орчин аялал жуулчлалын газраас өнөө жил гаргаж, цахим хуудаст тараажээ.

Учир нь сар шинийн өдрүүдэд хот хөдөөгийн эр хүйстэй бүхэн “хийморь сэргээх” их үйлст Сүхбаатар аймгийн Дарьганга сумын нутагт байх Алтан овоо, Шилийн богдыг дайлаар морддог билээ.

Тиймдээ ч иргэдийн “хийморь сэргээх их үйлс”-ийн дараа үлдээдэг ул мөр нутгийнхныг ийн хашрааж, сэрэмжлүүлэг гаргахаас өөр аргаагүйд хүргэсэн нь лавтай.

Уриалгад “шинийн 8-15-ны өдрүүдэд Шилийн богд уулан дээр гарч Хийморь лундаагаа сэргээсэн бол хог хаягдал битгий хаяарай. Та нүд алдам тал нутагт минь хүрэлцэн ирж ариун дагшин уул усан дээр гарч хийморь лундаагаа сэргээж, адис авбал зөвхөн “шар будаа, хуурай цай, халтар арвайг” өргөж байгаарай” хэмээн “гуйжээ”.

Гэвч тэдний гуйлт хийморио сэргээгчдэд өчүүхэн ч хүрсэнгүй бололтой.

Өнөө жил энэ уламжлал ч алдагдсангүй шинийн найман, арван тавны дотор Шилийн богдод гарч хиймороо сэргээх гэсэн иргэд, машины цуваа тасарсангүйн дээр Шилийн богд, Алтан дарь овоо дахин хогонд дарагдан үлджээ.

Хийморь сэргээгчид тавагтай ул боов, ууттай чихэр, шилтэй архи, сүү, шар, цагаан будаа... тэргүүтнийг овооны энгэрт ярайтал нь өрж, хогон овоолго үүсгээд буцах ажээ.

Харин ингэж хогон овоолго үүсгээд хийморь сэргэдэг бол өнөөдөр монголчууд хөгжлийн дээд түвшинд хүрч, бид өнөөдөр баян тансаг амьдрах байсан биз ээ. Иймд сүсэглэхдээ хүртэл зөв сүсэглэж сурахыг учир мэдэх хүмүүс уриалж, хүсч байгааг энд уламжилъя.

---