Манай улсын бүх аж ахуйн нэгж, хувь хүмүүс жилийн эцсийн тайлангаа оны эхний хоёрдугаар сарын 10-ны дотор хэд хэдэн цахим сайтад өгдөг болоод удаж байна. 2018 оны жилийн эцсийн санхүүгийн тайланг хүлээж авах өдрийг энэ сарын 18-н хүртэл сунгасан. Учир нь цахилгааны гэмтлээс болоод И-баланс системд алдаа гарсан юм. Үүнээс болж нягтлан бодогч нар тайлангаа хугацаандаа мэдүүлэхийн тулд өдөр, шөнөгүй И-баланс системийг ширтэн сууж байна. Хэрвээ тайлангаа хугацаандаа мэдүүлэхгүй бол Зөрчлийн хуулиар хуулийн этгээдийг 4 сая, хувь хүнийг 400 мянган төгрөгөөр торгуулна. 

Цахим систем нэвтрүүлж, ард иргэдийн ажлыг хөнгөвчилсөн мэт ярьдаг ч хачир дээрээ гацдаг, ачаалал даадаггүй, хуучин системтэйгээ зууралдуулахаа хэзээ болих юм бол

Торгохоо урьтал болгохоос өмнө Сангийн яам 2011 оноос хойш хөгжөөгүй шилэн данс, санхүүгийн тайлан, татварын цахим тайлан сайтуудын программ хангамжаа шинэчлэх цаг нэгэнт болжээ.

Нягтлан бодогч нарын фэйсбүүк группт “Сангийн яам жилийн жилд хэдэн муу нягтлангуудаа зовоох юм”, “И-баланс системийн доголдлоос болоод шөнө суун шивэлтээ хийж байна” гэх иргэдийн бухимдсан сэтгэгдэл тасрахгүй. Сангийн яам гурван хоног сунгасан гэх боловч энэ нь ажлын өдөр биш амралтын хоёр өдрийг оролцуулан сунгасанд нягтлан бодогч нарыг гэр орон, амьдралгүй гэж бодон сунгасанд “баярлаж” буйгаа илэрхийлсэн байв.

Зөвхөн жилийн эцэст ийм асуудал гардаггүй улирал болгоны тайланг өгөх үеэр ч систем нь гацдаг талаар нягтлангууд Сангийн яаманд гомдол гаргадаг. Нэг л их цахим систем нэвтрүүлж, ард иргэдийн ажлыг хөнгөвчилсөн мэт ярьдаг ч хачир дээрээ гацдаг, ачаалал даадаггүй, хуучин системтэйгээ зууралдуулахаа хэзээ болих юм бол.

Сангийн яам 2011 оноос хойш хөгжөөгүй шилэн данс, санхүүгийн тайлан, татварын цахим тайлан сайтуудын программ хангамжаа шинэчлэх цаг нэгэнт болжээ

Татварын ерөнхий газраас цахим татварын системийн шинэ хувилбарын хөгжүүлэлтийг энэ сарын сүүлээс хийн, сервер тоног төхөөрөмжүүдийг шинэчилнэ гэсэн зар тавьснаас өөр зүйл алга. Иймд дараагийн тайлангийн үеэр ч цахилгааны гэмтэл, серверийн доголдол хэвээр байх нь тодорхой байна. Сангийн яам хэзээ серверээ шинэчлэх бол?! 

 

 

 

---