“УИХ-ын гишүүн, Дархан аварга Б.Бат-Эрдэнийн хоёр түрүүг хүчингүй болох тухай” албан бичиг өнөөдөр зарим хэвлэлүүдэд гарсан билээ. Гэвч уг албан бичиг нь өнгөрсөн 2018 оны 07-р сарын 18-ны он сартай ажээ.

Монгол Улсын ерөнхийлөгчид хаягласан уг албан бичигт:

Дархан аварга Б.Бат-Эрдэнэ улсын наадамд 11 удаа түрүүлсэн нь тухайн үеийн МҮБХ-ны засуул, цэцдийн буруу шүүлт ихээхэн нөлөөлсөн гэдгийг онцолжээ.

Ингээд Дархан аваргын 1987 он болон 1993 оны барилдаж давсан даваануудыг хууль бус гэдгийг жишээ болгож дурджээ.

“1987 оны наадмын дөрвийн даваанд дархан аварга Б.Бат-Эрдэнэ Улын начин Жамцын Даваажавт өвдөг шороодсон ч тухайн үеийн засуул, цэцүүд дахин барилдуулна гэж хууль бус шийдвэр гаргасан учир Ж.Даваажав: “Хаяж болдоггүй бөх юм бол дахин барилдаж яах юм” гэж орхин явснаар Дархан аварга Б.Бат-Эрдэнийг давсанд тооцож байжээ” гэжээ.

Мөн “1993 оны наадмын зургаагийн даваанд Ховд аймгийн харъяат, Улсын начин И.Мөнхбаатарт наадамчин олны өмнө унахад тухайн үеийн МҮБХ-ны засуул, цэцүүд дархан аварга Б.Бат-Эрдэнийг давсан гэсэн хууль бус, илт үндэслэлгүй шийдвэр гаргаж улсын начин И.Мөнхбаатарыг хохироосон./бичлэгийг хавсаргав/” гэжээ.

Үүнээс гадна Дархан аварга Б.Бат-Эрдэнэ улсын наадмуудад бөхчүүдийг дарамталж, шантаажилж, найраа хийж даваа авч байсан гэдгийг ч дурдаад “дээрх хууль бус түрүүнүүдийг хүчингүй болгуулж, түүнээс болж хохирсон И.Мөнхбаатарт Улсын заан, Ц.Цэрэнпунцагт Улсын арслан, Д.Мөнх-Эрдэнэд Аварга цолыг нь олгохыг хүсч байна” гэдгээ албан бичигт онцолжээ.

МҮБХ-ны Цэцдийн зөвлөлийн дарга Ү.Хүрэлбаатарын гарын үсэгтэй уг албан бичгийг МУ-ын ерөнхийлөгчид албан ёсоор хүргүүлсэн эсэх, Ерөнхийлөгч хариу тайлбар өгсөн эсэх талаар тодруулахаар бид өнөөдөр/02.15/ түүнтэй холбогдсон юм.

Ингэхэд тэрээр,

“Энэ бол хуучирсан мэдээлэл оны өмнө болоод өнгөрсөн асуудал учраас яриа тайлбар ч өгөх шаардлагагүй. Түүнээс хойш хоёр бөхийн холбоо эвлэрч, нэгдээд хурлаа хийгээд, асуудлаа шийдчихсэн” гэсэн тайлбар өгсөн юм.

Өөрөөр хэлбэл, уг албан бичиг нь Чинбат тэргүүтэй бөхийн холбоо, Б.Бат-Эрдэнэ тэргүүтэй бөхийн гэсэн хоёр бөхийн холбоо гарч ирж, бөхийн өргөө болон холбоогоо булаалдан тэмцэлдэж байх үедээ нэгнийгээ “доош хийх” гэсэн “асуудал” болж таарч байна.

Түүнээс хойш буюу оны өмнөхөн УИХ-ын гишүүн, Дархан аварга Б.Бат-Эрдэнэ, Дархан аварга Х.Баянмөнх нар хамтарсан хэвлэлийн хурал хийж, эвлэрсэн гэдгээ онцолж, Бөхийн өргөөнд Цагаан сарын баярын бөхөө барилдуулна гэж мэдэгдэж байсан билээ.

Гэвч бөхийн өргөөнд Цагаан сарын барилдаан болоогүй нь чухам ямар шалтгаантай нь тодорхойгүй байна.

---