УИХ-ын намрын ээлжит чуулган завсарласан ч ээлжит бус чуулган хуралдах эсэх асуудал яригдаж буй. Ээлжит бус чуулган хуралдах эсэх дээр гишүүд ямар байр суурьтай байгааг бид тандлаа.
Тухайлбал, УИХ-ын гишүүн, МАН-ын бүлгийн дарга Д.Тогтохсүрэн ээлжит бус чуулганыг 3-р сард хуралдуулах байх гэдгийг онцоллоо. Ээлжит бус чуулганыг хуралдуулж Татварын багц хууль, Худалдан авах ажиллагааны тухай хууль, Сонгуулийн тухай хууль зэрэг хэлэлцэх шаардлагатай олон хууль, журмуудаа хэлэлцэж дуусгах шаардлагатай гэж үзэж байна. Ээлжит бус чуулганыг хуралдуулаад үргэлжлүүлэн Хаврын ээлжит чуулганыг хуралдуулах нь зөв гэсэн юм.

Харин МАН-ын бүлгийн дотоод дахь хагарал намжсан эсэх талаар тодруулахад,

- Одоо бидэнд хэрүүл тэмцэл хийх цаг байхгүй. 2016 онд дэвшүүлсэн хөтөлбөрөө хэрэгжүүлэхээс эхлээд хийх олон ажил байна. Тиймээс бүлэг дотооддоо сайн ярилцаад харьцангуй эв нэгдлээ олж байгаа гэдгийг онцоллоо.

---