Эрүүгийн цагдаагийн газрын Хар тамхитай тэмцэх хэлтэс өчигдөр их хэмжээний хар тамхи тээвэрлэж явсан гурван иргэнийг баривчиллаа. Цагдаагийн байгууллагаас дэлгэрэнгүй мэдээллийг одоо болтол өгөөгүй байгаа нь энэхүү импортлогч, борлуулагч, хэрэглэгч гэсэн далд сүлжээний бусад гишүүдийг илрүүлэхээр ажиллаж буйтай холбоотой ажээ. 

500 гаруй сая төгрөгөөр үнэлэгдэх "мөс" хэмээх мансууруулах бодис хилээр нэвтрүүлж, хүлээн авсан эдгээр иргэд нь 19-32 насны хоёр эрэгтэй, нэг эмэгтэй байсан байна. Тэднийг Сүхбаатар дүүргийн IV хорооны нутаг дэвсгэрээс Хар тамхитай тэмцэх хэлтэс, ГЕГ-ын албан хаагчидтай хамтран шуурхай ажиллагаа явуулан баривчилжээ. 

Албан бус эх сурвалжаар, эдгээр иргэд олон улсын шуудан, илгээмжээр хар тамхиа оруулж ирсэн гэнэ. Хар тамхичдад оногдуулах хууль харьцангуй хөнгөрсөн, хэрэглэгч олон болсон учир энэ зах зээл рүү богино хугацаанд олз олох гэсэн залуучууд орж, гэмт хэрэгтэн болж байна гэж албаныхан тайлбарлаж байна.

Сүүлийн үед АНУ, ХБНГУ зэрэг арав орчим орноос олон улсын шуудан, илгээмжээр хар тамхи оруулж ирж байгааг илрүүлэн шалгаж байгаа. Саяхан хэлний төвд багшаар ажиллаж байгаад баригдсан Нигер улсын гурван иргэн бол тэдний нэг гэсэн мэдээллийг мөн өглөө.  

---