Т.Батсайхан

Нийслэлийн прокурорын газраас “Жаст групп”-ын захирал Ш.Батхүүтэй холбогдсон хэрэгт яллах дүгнэлт үйлдэн шүүхэд шилжүүлжээ. Хэргийг Хан-Уул дүүргийн эрүүгийн хэргийн анхан шатны шүүх хэлэлцэн шийдвэрлэхээр болсон байна. АТГ, ЦЕГ-аас хамтарсан ажлын хэсэг мөрдөн шалгах ажиллагаа явуулсан бөгөөд улсад учруулсан хохирол нь үлэмж их гэдгийг хэргийн материалд дурдсан байна. Тодруулбал, яллагдагч “Жаст групп” ХХК-ийн захирал Ш.Батхүү нь “Эрдэнэт үйлдвэр” ХХК-ийн нэр бүхий албан тушаалтнуудтай санаатай нэгдэж, бүлэглэн “Стандарт банк Пи Эл Си-тэй байгуулсан гэрээний зарим баримтуудыг хуурамчаар үйлдэн нийт 160.100,.000.00 ам.долларын буюу 220 тэрбум, 276 сая, 450 мянган төгрөгийн зээлийг хуурамч баримт үйлдэн залилан мэхлэх аргаар авч өөртөө болон өөрийн хамаарал бүхий аж ахуй нэгжийн үйл ажиллагаанд зарцуулсан байжээ. “Стандарт банк Пи Эл Си ” нь Олон улсын Арбитрын шүүхэд “Эрдэнэт үйлдвэр” ХХК-д холбогдуулан нэхэмжлэл гаргаснаар, Английн Лондон хотын Арбитрын шүүхийн шийдвэрээр нийт 92.685.803.16 ам доллар буюу 215 таван тэрбум 388 сая, 407 мянга, 342 төгрөгийг “Эрдэнэт үйлдвэр” ХХК-иар төлүүлэхээр шийдвэр гаргасны улмаас төрийн өмчийн оролцоотой “Эрдэнэт үйлдвэр” ХХК-д их хэмжээний хохирол учирсан гэж үзсэн байна.

Энэ хэрэгтэй холбоотойгоор Г.Алтан “Би энэ сүлжээнд ямар ч хамаагүй. Тэр компани хэнээс ямар зээл авч байсан ямар бизнес үйл ажиллагаа явуулж байсныг би сонирхдоггүй байсан. Ш.Батхүүг ч сайн танихгүй. Миний хүү Сүрэн Ш.Батхүүд зээл өгч тэр зээлээ төлөх үүрэг хүлээж “Хадгаламж” банкны батлан даалт гаргасан” гэсэн тайлбарыг өгч байлаа.

Үүнээс гадна Ш.Батхүүг  “Алтжин” группын захирал Г.Алтан, түүний хүү Э.Сүрэн нартай бүлэглэн Төрийн банкийг залилан мэхэлсэн гэж үзжээ.  Хэрэгт Иргэний хэргийн шүүн таслах ажиллагаанд оролцохдоо нотлох баримтыг хуурамчаар бүрдүүлж, их хэмжээний хохирол учруулсан буюу залилан мэхлэх гэмт хэргийг байнга үйлдэж, амьдралын эх үүсвэрээ болгосон гэдгийг дурдсан байна.

Өнгөрсөн хугацаанд энэ хэрэгтэй холбоотойгоор Г.Алтан “Би энэ сүлжээнд ямар ч хамаагүй. “Жаст” группт би хэзээ ч хувь эзэмшиж байгаагүй. Тэр компани хэнээс ямар зээл авч байсан ямар бизнес үйл ажиллагаа явуулж байсныг би сонирхдоггүй байсан.  Ш.Батхүүг ч  сайн танихгүй. Миний хүү Сүрэн Ш.Батхүүд зээл өгч тэр  зээлээ төлөх үүрэг хүлээж “Хадгаламж” банкны батлан даалт гаргасан” гэсэн тайлбарыг өгч байлаа. Харин Эдвард Сүрэн нь Төрийн банкинд луйвардуулсан гэж тайлбарласан байдаг. Харин прокурор энэ удаа Г.Алтанг Ш.Батхүүтэй  бүлэглэн Төрийн банкийг залилсан гэж үзжээ.

Төрийн банк, Г.Алтангийн хүү Эдвард Сүрэн нарт холбогдох хэргийн шүүх хурал өнгөрсөн оны дөрөвдүгээр сард Сүхбаатар, Чингэлтэй, Баянзүрх дүүргийн анхан шатны шүүхэд болж, Төрийн банк шүүхэд ялагдаж Эдвард Сүрэнд 51.5 тэрбум төгрөг төлөх шийдвэр гарсан байдаг.  Иргэн Эдвард Сүрэн 2010 онд Хадгаламж банканд 51.5 тэрбум төгрөгийг хадгалуулж, банкнаас баталгаа авсан гэдэг ба үүнийг тухайн үеийн Хадгаламж банкны эзэн байсан, Жастын Ш.Батхүү үнэн хэмээн баталдаг. Харин Хадгаламж банк төрийн мэдэлд шилжих үед нэг ч төгрөг шилжиж ирээгүй, тухайн үед Хадгаламж банк баталгаа гаргах ямар ч эрхгүй байсан гэж Төрийн банк тайлбарладаг юм.

Иймд талууд шүүхэд 2013 онд хандсан ба шүүхийн шийдвэр ‘Жаст компаниас 51.5 тэрбум төгрөгийг гаргуулж нэхэмжлэгч Эдвард Сүрэнд олгосугай.  Хэрэв “Жаст” уг өөрийг төлөөгүй тохиолдолд Төрийн банк төлнө’” гэх шийдвэр гаргасан байдаг.   Харин Төрийн банк  шинээр илрүүлэх нөхцөл байдал үүсгэж хянуулах хүсэлтээ шүүхэд хэд хэдэн удаа гаргажээ.

Хамгийн сүүлд Төрийн банк дахин шалгуулахыг хүсэхдээ, Хадгаламж банкнаас шүүхэд өгсөн тогтоол, тэмдэглэл зэрэг баримтууд нь Архивын ерөнхий газарт хадгалагдаж байгаа баримтуудтай таарахгүй байна гэжээ.Үүнийг нь шүүх хүлээн авах боломжгүй гэж үзсэн. Төрийн банктай Ш.Батхүүгийн холбогдсон дээрх асуудлыг Эрдэнэтийн 51 хувийг барьцаалан зээл авсан хэрэгтэй хамт шалгаж байсан бөгөөд ийнхүү прокурорын шалгалтаар бол Төрийн банк Г.Алтан, түүний хүү Э.Сүрэн нарт ямар ч өргүй харин ч залилуулсан болох нь тогтоогдоод байна.

2019.2.13 № 29 (5996)

---