1990 оноос хойш Монгол Улсад үндэсний, салбарын болон салбар хоорондын түвшинд урт, дунд, богино хугацааны хөгжлийн бодлогын 500 орчим баримт бичиг батлагдсанаас 190 гаруй нь хүчинтэй байдаг.

Эдгээр баримт бичгийн олонх нь Хөгжлийн бодлого төлөвлөлтийн тухай хууль, “Монгол Улсын тогтвортой хөгжлийн үзэл баримтлал-2030” батлагдахаас өмнө гарсан учраас нэршлийн хувьд хуульд нийцээгүй, хэрэгжих хугацааны хувьд замбараагүй, хуулийн шаардлага хангахгүй, урт хугацааны зорилго, зорилтуудыг хангахад чиглээгүй, хоорондын уялдаа сул, бодлогын нэгдмэл цогц байдал алдагдсан гэдгийг Үндэсний хөгжлийн газраас танилцуулж байгаа юм.

Тиймээс Хөгжлийн бодлогын баримт бичгүүдэд үнэлгээ хийх болон дэлхийн тогтвортой хөгжлийн зорилтуудын үндэсний шалгуур үзүүлэлт, зорилтот түвшинг тодорхойлох зорилгоог ажлын хэсэг байгуулж ЗГХЭГ-ын дарга  Л.Оюун-Эрдэнэ удирдаж эхэлсэн юм.

Ажлын хэсэгт Монгол банк, Авлигатай тэмцэх газар, Үндэсний статистикийн хороо, Санхүүгийн зохицуулах хороо, Төрийн албаны зөвлөл, Үндэсний аюулгүй байдлын зөвлөл, Хүний эрхийн комисс зэрэг байгууллагын удирдлага, яамдын Төрийн нарийн бичгийн дарга нар багтаж байгаа бөгөөд өнөөдөр ажлын хэсгийн анхны хуралдаан болжээ.

Бодлогын баримт бичгүүдийг үнэлэх ажлын үр дүнд үндэслэн уялдаа хангахгүй байгаа баримт бичгүүдийг хүчингүй болгох, шинэчлэн боловсруулах, цөөлөх шийдвэрийг Засгийн газар гаргана. Түүнчлэн баримт бичгүүдийн үнэлгээний ажил нь цаашид хөгжлийн бодлогыг дэлхийн тогтвортой хөгжлийн зорилтуудтай уялдуулж, нэгдсэн зохицуулалттай хэрэгжүүлнэ гэдгийг Ажлын хэсгийн дарга, ЗГХЭГ-ын дарга Л.Оюун-Эрдэнэ хэллээ.

Мөн өмнө гарсан бичиг баримтуудыг нягталж, үнэлээд, үнэлгээнд тулгуурлан дараагийн 20-25 жилийн хөгжлийн төсөөллийг гаргая гэлээ. Энэ ажилд цаг зав, сэтгэл гаргаж, илүү санаачилгатай, бүтээлч ажиллахыг ажлын хэсгийн гишүүдэд үүрэг болголоо.

Засгийн газрын 2016-2020 оны үйл ажиллагааны хөтөлбөрийг биелүүлэхэд анхаарч ажиллана. Зөвхөн өчигдөр, өнөөдөр биш ирээдүйг төлөвлөж, хамтын төсөөлөлтэй болъё. УИХ, Засгийн газрын гишүүд, улс төрийн намуудын түвшинд Монгол Улс ийм бодлогоор хөгжинө гэсэн нэгдсэн бодлоготой болох нь зүйтэй гээд энэ бодлогыг тодорхойлон гаргах хүмүүс нь төрийн албанд удирдах албан тушаал хашиж буй та бүхэн юм гэдгийг ЗГХЭГ-ын дарга Л.Оюун-Эрдэнэ онцолжээ.

 

Эх сурвалж: Zasag.mn

---