Монгол Улсын нялхсын эндэгдлийн 60 гаруй хувийг 0-6 сартай хүүхэд эзэлж, түүний 70 гаруй хувийг нярайн эрт үеийн,  30 орчим хувийг хожуу үеийн эндэгдэл эзэлж байна.

Нийт нярайн 4.6 хувь нь дутуу, бага жинтэй төрж эндэгдлийн 66.2 хувийг эзэлж байгаа тул дутуу төрөлтийг бууруулах, дутуу нярайд үзүүлэх эмнэлгийн тусламж үйлчилгээг сайжруулах, амьдрах чадварыг нэмэгдүүлэх зайлшгүй шаардлагатай байгаа юм. Тиймээс Эрүүл мэндийн сайд энэ жил нярайн эндэгдлийг бууруулж ажиллахыг үүрэг болгожээ.  

Харин нярай судлалын салбарт орчин үеийн дэвшилтэт технологи болох сурфактант эмчилгээг хэрэглэснээр улс орнууд бага жинтэй нярайн амьдрах чадварыг 90  хүртэл хувиар нэмэгдүүлж байгаа ажээ. Тиймээс Монгол улсад дутуу, бага жинтэй нярайн эндэгдлийн тэргүүлэх шалтгаан нь амьсгал хямралын хамшинж (48.1%) тул сурфактант эмчилгээг хэрэглэх шаардлагатай байгааг мэргэжилтнүүд онцолж байна. 

Ургийн хөгжлийн 22-24 долоо хоногтойгоос уушгины эс сурфактант нийлэгшүүлж эхлэх ба 34 долоо хоног хүрэхэд хангалттай нийлэгждэг. Хүүхэд анхны амьсгал авч эхлэхэд шингэн шимэгдэн, сурфактант цулцангийн гадаргууг жигд бүрхдэг байна. Нярайн сурфактант эмчилгээ хийх арга зүйн зааврыг Эрүүл мэндийн сайдын тушаалаар батлан хэрэгжүүлж байгаа юм байна. 

---