Манай улсад олон улсын Рамсарын гэрээнд нэгдсэн хоёр нуур байдгийн нэг нь Архангай аймаг дахь Өгий нуур, нөгөө нь Сүхбаатар аймаг дахь Ганга нуур юм. Энэ хоёр нуур хоёул ховор загас шувуу, ан амьтдын ундаалах эх болсон нутаг юм. 

Гэвч зохион байгуулалтгүй аялал жуулчлал, даац нь хэтэрсэн мал аж ахуй болон хүний буруутай үйл ажиллагаанаас болж дээрх хоёр нуур хоёулаа бохирдож, ширгэж, жилээс жилд эко систeм нь алдагдсаар байна.

Тиймээс Өгий, Ганга нууруудыг хамгаалах Засгийн газрын тогтоол гарч, тодорхой төсөв тусгажээ. Уг төсвийг хэрхэн зарцуулж, нуурын хамгаалалтыг яаж хийх, усны түвшнийг хэрхэн нэмэгдүүлэх талаар Өгий нуурын иргэд, БОАЖЯ, УИХ-ын гишүүн Ж.Мөнхбатын ажлын албаныхан санал солилцож байна. Эхний ээлжинд Өгий нуурыг хамгаалахын тулд оролт, гаралтын суваг, шуудуу татаж нуурын усыг цэврээр нь хамгаалж үлдэх шаардлага байгааг энэ зөвлөгөөнд оролцогчид онцолж байна.

Өгий нуурын өмнө тулгамдсан бас нэг асуудал нь загас агнуур бөгөөд хэдэн жилийн өмнө элбэг байсан загас одоо эрс багасчээ. Тиймээс загасны нөөцийг тогтоож, нөөц эрс багассан тохиолдолд загас агнуурыг хориглох шаардлагатай байгааг мөн хэлж байна.

Мөн нуурыг хамгийн ихээр бохирдуулж байгаа малын хөлийг хорьж, нууран дээр завь явуулахгүй байх, хамгаалалтын хашаа татах зэрэг арга хэмжээ авах саналууд гаргаж байлаа. Түүнчлэн нуурыг тойрсон жуулчны баазуудын даац хэтэрсэн учир энэ асуудлаар ч мөн судалгаа шинжилгээ хийж, тодорхой арга хэмжээ авах шаардлага байгааг нутгийн иргэд онцолж байна.

 

---