Эмэгтэйчүүд өөрийн гэр бүлийн болон хувийн аюулгүй байдлаа анхаарч явах нь чухал юм. Эмэгтэйчүүдийн амь нас, эрүүл мэнд, нийгмийн харилцаа, нэр төрд аюул учруулж болзошгүй зарим нөхцөл байдлуудаас хэрхэн урьдчилан сэргийлэх талаар ЦЕГ-ын Гэрч, хохирогчийг хамгаалах хэлтсийн сэтгэл зүйч, цагдаагийн дэслэгч Ч.Нармөнхийн зөвлөгөөг хүргэж байна.

 

Та түүнээс хүчтэй, ухаалаг эмэгтэй гэдгээ санаарай

 

 

Бодит тохиолдол

Амьдралын боломжтой, ажил орлоготой ганц бие эмэгтэйчүүд, ээжүүдийг амар хялбар аргаар амьдрах, мөнгө олох арга хэрэгсэл болгон ашиглаж, тэжээн тэтгүүлэх замаар эмэгтэйд сэтгэл санааны болон эд материалын хохирол учруулж, зальхай, худалч хуурмаг, ёс зүйгүй танхаа балмад байдал нь илэрч, аргаа барах цагтаа зодож хүчирхийлэх, салахгүйн тулд хайртай, дуртай гэж жүжиглэн амиа хорлохоор сүрдүүлэх, дагаж мөшгих, нэр төрийг нь гутаах зэргээр авирладаг эрчүүд цөөнгүй.                                                 

Эдгээр эрчүүдийг таньж болох шинж тэмдэг

 

 

·         Сэргэлэн, цэвэрхэн хувцасласан, хүнтэй хэл амаа ололцох чадвартай

·         Эмэгтэйчүүдийн ганцаардсан, хайр халамж хүссэн, амьдралын ханиа хайсан сэтгэлийг маш овжин ашигладаг

·         Эмэгтэй хүүхдийг халамжлах, төрсөн эцэг шиг нь байж өсгөнө гэх зэргээр ярьж сэтгэл уярам байдлаар биеэ авч явах

·         Эмэгтэй түүнийг газар ч гишгүүлэхгүй шахам халамжилж, гэрийн түлхүүрээ өгч гэрийн эзний дайтай хандаж эхлэх

·         Өмнө нь нэг биш нэлээд олон эмэгтэйчүүдээр тэжээлгэн, хамт амьдарч байгаад гэрээс нь үнэтэй эд зүйл хулгайлсан, зодсон, хуурсан, орлогын эх үүсвэрээс  салгасан зэрэг шалтгаанаар салсан, уулзахгүй зугтаж байгаа

·         Утасны дугаараа ойр ойрхон солих, утсанд нь өөр өөр эмэгтэйчүүдээс дуудлага, мессеж ирэх

 

                 

 

·         Баар, ресторанд ууж, тасарсан үедээ дуудаж баарны болон таксины төлбөр төлүүлэх зэрэг үүнтэй төстэй байдал олон удаа давтагдах

·         Эрхэлсэн тодорхой ажилгүй, эсвэл ажлын байранд тогтвор суурьшилгүй, амжилт гаргаагүй

·         Юу ч хийж бүтээхгүй мөртөө хийрхүү, ихийг мөрөөдсөн давилуун яриа, үйлдэлтэй

·         Хаанаас мөнгө олоод байдаг нь тодорхойгүй

·         Эмэгтэйнхээ итгэлийг нь олсон үедээ үе үе ууж согтуурах, хэрэлдэх муудалцах үед өнөөх сайхан сэтгэлтэй залуугаас гарамгүй сонин, этгээд, ёс зүйгүй авир цухалзаж, айж ичихээ умартаж эхлэх

 

 

·         Эмэгтэй ойролцоогоор 3-6 сарын дараа залуугийн мөн чанарыг таньж эхлэхийн зэрэгцээ цочирдом, сэтгэл эмзэглүүлэм, итгэхийн аргагүй зан араншингуудыг нь мэдэж, айх гайхах

·         Салах тухай мэдээ дуулгах, хэрэлдэх муудалцах, тусдаа байх тохиолдолд өөрийн хангамж, мөнгөний эх үүсвэрээс салах гэж байгаадаа туйлын хорсож амь тавин жүжиглэж эхлэх

·         Би чамд хайртай, чи минь наддаа цорын ганц, чамгүйгээр амьдарч чадахгүй гэж олонтаа хэлэх

·         Ажил, гэрийнх нь гадаа отох, мөшгөх, гэнэт дайрч хардах, зодох, хүчиндэх, гүтгэх зэргээр авирлаж цагдаа, шүүхэд гомдол мэдээлэл хүргэх зэргээр асуудал ноцтой байдалд шилждэг.

 

Гэрлэх гэж буй эрийнхээ өмнөх амьдралыг заавал судал

 

 

Уулзаж учирч, амьдралын ханиа хайж байгаа эмэгтэйчүүд болзож байгаа болон ханилан суухаар шийдэж буй эрэгтэйнхээ өмнөх амьдралын түүх, өмнөх эмэгтэйн талаар судалж үзэхэд магадгүй иймэрхүү түүх цухалзахыг үгүйсгэхгүй нийгэмд амьдарч байгаа гэдгийг санаж явахад илүүдэхгүй болов уу. 

Эмэгтэйчүүдийн зүгээс гаргадаг зарим нэг алдаа нь өөрөөсөө нас залуу эрэгтэйн ёс зүйгүй, хууль бус үйлдэлд өртөж бие сэтгэл, эрүүл мэнд, нэр төр, эд хөрөнгөөрөө хохирч үлдсэн ч олны хэл ам, хүнд хэлэхээс ичиж цагдаагийн байгууллагад мэдээлэхгүй байх тохиолдол их байдаг. Энэ нь иймэрхүү төрлийн залуусыг өөгшүүлж амьдрах арга хэрэгслээ болгоход нөлөөлдөг.  

 

Түүнд өөрөөсөө холдон явах боломж олго

 

 

Дээрх аюултай нөхцөл байдлаас урьдчилан сэргийлэхийн тулд дараах арга хэмжээг авч байгаарай!

1. Эмэгтэй таны бие махбодь, эрүүл мэнд, нэр төрд тань халдсан болон таныг айдаст автуулсан, цочирдуулам үйлдэл хийх бүрд  цагдаагийн байгууллагын 102 тусгай дугаарт дуудлага өгч байх. Энэ нь цаашдаа таньд хууль, эрх зүйн хүрээнд найдвартай хамгаалалт болж, иймэрхүү этгээдүүд танаас өөрөө холдон явах боломж олгох.

2. Цагдаагийн байгууллагын 102 тусгай дугаарт дуудлага өгсөнөөр тухайн хүн гэмт санаа, зорилготой этгээдүүдийн бүртгэл судалгаанд бүртгэгдэж, цагдаагийн байгууллагын хараа, хяналтад орсноор дахин олон хүн хохирогч болохоос урьдчилан сэргийлэх ач холбогдолтой.

 

 

3. Эмэгтэй таны бие махбодь, эрүүл мэндэд халдаж гэмтэл, бэртэл учруулсан бол Шүүхийн шинжилгээний үндэсний хүрээлэн, Гэмтэл согог судлалын үндэсний төв, Сүхбаатар дүүргийн нэгдсэн эмнэлгийн дэргэдэх Нэг цэгийн үйлчилгээний төвийн сэтгэлзүйн болон эрүүл мэндийн үзлэг, шинжилгээнд хамрагдаж баталгаажуулж байх. Мөн шарх, гэмтлийг фото зургаар, эмчийн үзлэгийн хариу, заналхийлсэн дуудлага, мессеж зэргийг баримтжуулан хадгалж байхыг зөвлөж байна.

4. Танд сэтгэл эмзэглүүлж, өөртөө итгэх итгэлийг тань бууруулсан ийм үйл явдал тохиолдож эхэлсэн бол нэн түрүүнд мэргэжлийн сэтгэлзүйчид хандаарай! Сэтгэлзүйн зөвлөгөө, засалд хамрагдсанаар сэтгэцийн болон сэтгэлзүйн хэвийн байдлаа хадгалж, нөхцөл байдлыг ухамсарлаж зохистой хариу үйлдэл үзүүлэх, ухаалаг шийдвэр гаргах, өөрийн болон гэр бүл, үр хүүхдийнхээ амь нас, аюулгүй байдалд анхаарал хандуулах чадвар тань сэргэх болно. Та түүнээс хүчтэй, ухаалаг, амьдрах чадвартай, бие даасан эмэгтэй гэдгээ санаарай. 

 

 

Хэрвээ танд танилцсан залуу, эсвэл үерхэн, хамтран амьдарч буй залуу чинь занахийлж, айлган сүрдүүлж, хүчирхийллийн хэлбэртэй янз бүрийн үг, үйлдэл гаргаж дарамталсан бол ЦЕГ-ын Гэрч, хохирогчийг хамгаалах хэлтсийн доорх утас руу хандаарай. Бид танд зөвлөн түргэн шуурхай туслах болно.

 

---