Хүн төрөлхтний заналт дайсан ХДХВ/Дохын халдвар авсан 14,200 хүний биеийн байцаалт цахим ертөнцөд тарсан тухай Сингапур улсын эрүүл мэндийн газраас мэдэгджээ. Сингапурын Эрүүл мэндийн яамны мэдээлснээр 2013 оны нэгдүгээр сараас өмнө Дох-ын халдвар авсан 5,400 дотоодын иргэн, 2011 оны 12 дугаар сараас өмнө бүртгэгдсэн 8,800 гадны иргэний мэдээл цахим орчинд ил болжээ.

Өвчтний нэр, биеийн байцаалтын дугаар, гар утасны дугаар, хаяг, Дох-ын шинжилгээний бичиг, эрүүл мэндийн мэдээлэл зэргийг Сингапур улсын иргэн тараасан гэж үзэж байна. Мэдээл цацагдсаны дараа эмч мэргэжилтнүүд өвчтнүүд рүү холбогдож анхааруулж байна.

Түүнчлэн Эрүүл мэндийн яам гаргасан алдаандаа уучлалт гуйж, алдаагаа засч залруулахаар ажиллаж байгаа юм.  Өвчтнүүдийн нууц мэдээлэл алдагдсанаар ажил олгогч, гэр бүл, ойр дотны найз нөхөд нь цочролд орох, харилцаа нь хөндийрөх зэрэг үр дагавартай. Өөрөөр хэлбэл Дох-ын халдвар тээгчдээс зугтах, ялгаварлан гадуурхах нь сэтгэл санааны хувьд маш хүнд цохилт болно гэж эмээж байна.

Дох ижил хүйстнээ сонирхогчдын дунд тархалт өндөр байдаг. Гэвч Сингапурт үүнийг хуулиараа хүлээн зөвшөөрдөггүй, хоёр жил хүртэл хорих ялтай.

Мэдээллийг тараасан сэжигтэн 2018 оны тавдугаар сар хүртэл Сингапурт амьдарч байгаад АНУ руу шилжин суурьшсан Мики К Фаррера Брочез гэгч юм байна. Тэрээр хуурамч эмийн хэргээр дөрвөн жил хоригдож байгаад Америк руу дүрвэсэн этгээд юм. 2016 он хүртэл Сингапур улс руу Дох-ын халдвартай гадны иргэдийг нэвтрүүлэхийг хориглодог байсан юм. Одоо ч Сингапурт амьдардаг халдвар тээгч гадны иргэдэд виз олгох, ажил эрхлэхийг зөвшөөрдөггүй ажээ.

 

Эх сурвалж: www.cnn.com

---