УИХ-ын гишүүн Л.Оюун-Эрдэнэ, Т.Аюурсайхан нарын гишүүд өнөөдөр УИХ-ын дарга М.Энхболдыг албан тушаалаас нь чөлөөлөх хуулийн төслийг өргөн барих талаараа мэдээлэл хийснээс хойш хэдэн хормын дараа дахин хэвлэлийнхэнд хандлаа. 

Энэ хуулийн төсөлд нийт 39 гишүүн гарын үсэг зурсан, УИХ-ын гишүүн З.Нарантуяа орон нутагт томилолттой байгаа учраас гарын үсэг зурахаа илэрхийлсэн ч өөрийн биеэр үдээс хойш ирж албан бичгээр хүсэлтээ өгнө гэдгээ илэрхийлсэн байна. Өөрөөр хэлбэл гарын үсэг зурсан гишүүдийн тоо 40 хүрчээ.

УИХ-ЫН ГИШҮҮН Л.ОЮУН-ЭРДЭНЭ:

-УИХ-ын даргад энэ тогтоолын төслийг яаралтай дэгээр хэлэлцүүлж өгөөч гэсэн хүсэлт өгсөн ч ирэх долоо хоногийн Мягмар гариг хүртэл хойшлуулна гэж байна. Иймд бид чуулганы хуралдаанд горимын санал гаргана. Хэрэв дэмжихгүй бол бид чуулганы хуралдааныг бойкотолно. Хоёр ч удаагийн жагсаал цуглаан болж, дөч орчим гишүүн чуулганы үйл ажиллагааг мөн л дөч орчим хоног бойкотолж байж ийм түвшинд хүрч байхад заавал хоёр хоногийн завсарлага авч байгаад бид гайхаж байна. Баасан гарагийн чуулганыг бид бойкотлоно.

 

---