Жил бүрийн энэ үед дэлхий дээрх хамгийн олон хүний шилжилт хөдөлгөөн БНХАУ-д эхэлдэг. Учир нь жил бүр хятадууд Хаврын баяраа тэмдэглэж, гэр бүл, хамаатан саднаа зорьдог. Энэ жилийн хувьд Хятадын Хаврын баяр буюу Цагаан сар нь хоёрдугаар сарын 5-­нд эхлэхээр байгаа юм. Хятадууд энэ жилийн Цагаан сараар дунджаар 40 орчим хоног амрахаар байна. Энэ хугацаанд нийт 1.3 тэрбум хүн дотооддоо аялах төлөвтэй байгаа аж. Энэ их хүн ойрын хэд хоногийн хугацаанд нэгэн зэрэг шилжилт хөдөлгөөн хийснээр зам тээвэр хэд дахин ачаалалтай болох нь дамжиггүй.

Галт тэрэгний тасалбарын онлайн худалдаагаар л гэхэд нэг секундэд  1000 тасалбар борлогддог байна. Хятадын Зам тээврийн яамны мэдээлж буйгаар, энэ жил хот хооронд зорчих зорчигчдын тоо өмнөх жилийнхээс 2.2 хувиар их байх төлөвтэй аж. Мөн энэ сарын 21­-нээс хоёрдугаар сарын 21-­нийг хүртэлх хугацаанд зорчигчдыг тээвэрлэсэн 42 сая удаагийн усан тээвэр, 58 сая нислэг, 356 сая гал тэрэгний зорчилт хийгдэх урьдчилсан баримжааг гаргасан байна. Түүнчлэн Үндэсний хөгжил, шинэчлэлийн хорооны дарга Лиан вэйлянгийн мэдээлснээр, 2.4 тэрбум машин орон нутгийн аялалд гарахаар байгаа бол, 413 сая хүн төмөр замаар, 73 сая хүн агаарын тээврээр үйлчлүүлэхээр байгаа аж.

Энэ их шилжилт хөдөлгөөний улмаас галт тэрэг, нисэх онгоцны буудал, боомт зэрэг тээврийн газруудад эмх замбараагүй байдал үүсдэг учир зөвхөн Бээжингийн төмөр замын өртөөн дээр л гэхэд 400 гаруй цагдаа, 200 гаруй эргүүл, хамгаалалтынхан, 640 гаруй сайн дурын ажилчин хамгаалалтад гарчээ. “Синьхуа” агентлагийн мэдээлж буйгаар, өнгөрсөн оны сүүлчээр Хятад улс 10 төмөр зам шинээр ашиглалтад оруулснаар дэлхийн хамгийн урт төмөр замтай орон болсон. Одоогийн байдлаар тус улсын өндөр хурдны галт тэрэгний зам нь 29 мянган км-­ээр хэмжигдэж байгаа аж.

Түүнчлэн баярын өдрүүдэд нийт 4787 галт тэрэг иргэдэд үйлчлэх бөгөөд 3387 нь өндөр хурдны галт тэрэг байх гэнэ. Үүнээс гадна энэ жилээс эхлэн галт тэрэгний буудал бүрт тасалбар аваад гээгдүүлсэн иргэдэд зориулсан нүүр таних төхөөрөмж байрлуулж эхэлжээ. Мөн баярын өдрүүдээр БНХАУ-­д хамгийн томд тооцогдох Шанхай, Гуанчжоу, Шэньчжэнь, Чэнду, Куньмин зэрэг арван нисэх онгоцны буудал 24 цагаар ажиллахаар төлөвлөж байгаа тухай холбогдох албаныхан мэдээлжээ. БНХАУ-ын Зам тээврийн дэд сайд Лю Сяоминий мэдээлснээр, цахилгаан машинтай иргэдэд зориулж, 4.8 сая км хурдны замд 7400 цэнэглэгч станц байрлуулсан байна. Түүнчлэн Хятадын онлайн тийз захиалгын “Ctrip” байгууллагын тооцоолсноор, баярын өдрүүдээр долоон сая гаруй хүн 90 орчим оронд аялахаар урьдчилсан захиалга өгөөд байгаа аж.

Эх сурвалж: https://edition.cnn. com/travel/article/lunar-new-yeartravel-rush-2019/index.html

Ц.Даваасамбуу

 

---