Өглөө хаан шиг зооглож, Орой зарц мэт идэж бай

 

 

Өглөөний хоолыг өөртөө тунхагла

 

Өглөөний цай бол хүний өдөр тутмын хоол хүнснээс хамгийн чухал. Эрдэмтэд өглөөний цай огт уудаггүй хүмүүс эрүүл мэндийн асуудалтай тулгарах эрсдэл өндөртэй байдгийг анхааруулжээ. Ганц хоёр зүсэм хачиртай талхнаас татгалзах нь ирээдүйд зүрх судасны өвчин, ходоод гэдэсний үрэвсэл, хэт таргалалт, эсвэл сахарын өвчтэй болох аюултай.

 

 

Өглөөний цайг хайхардаггүй хүмүүсийг бусад хүмүүстэй харьцуулахад богино насалдаг гэсэн эрдэмтдийн судалгаа бий. Дэлхийн эрүүл мэндийн байгууллагын мэргэжилтнүүд “Өглөөний цай бол хүний өдөр тутмын эрч хүчийн 25 хувийг өгдөг. Хүмүүс өглөө уусан цайныхаа хүчинд дархлаа сайтай болдог” гэсэн дүгнэлт гаргажээ.

 

Өглөөний хоол идэхгүйгээр турна гэвэл эндүүрэл

 

 

Орой бага идвэл таргалахгүй байх боломжтой

Өглөө босонгуутаа яаруу сандруу хувцаслаад, ажил руугаа цайгаа ч уулгүй явдаг хүмүүс олон. Тэр дундаа залуу хүмүүс өглөөний цай хоолоо ууж тухлах дургүй. Зарим нь завгүй, зарим нь нойроо харамлан унтсанаас, эсвэл турахын тулд өлөн явдаг аж. Өглөөний хоол нь унтаж байх үед буурсан биеийн хэмийг өргөх үйлчилгээтэй. Товчхон хэлбэл биеийг өдөр тутмын ажиллагаанд бэлтгэх дасгал болж өгнө. Өглөөний хоол идэхгүй бол тархины энергийн гол үүсгэгч болох сахар дутагдаж, өдрийн хоол идэх хүртэл анхаарлаа төвлөрүүлж чадахгүйд хүрдэг. Тиймээс таны ажлын бүтээмж буурна. Тархиа болон биеэ ажлуулахын тулд өглөөний хоолоо идэх маш чухал. Өглөөний хоол идэхгүйгээр турна гэвэл том эндүүрэл.

 

 

Учир нь хүний бие хоол хоорондын зай ихэсч, хоолны тоо багасах үед энерги хуримтлуулахыг хичээж эхэлдэг. Бодисын солилцоо метаболизм буурч, өөх задлах чадал багасгадаг байна. Өглөөний хоол идэхгүйгээр өдөр, орой иддэг бол биен дэх инсулин  (сахарыг багасгах гормон) нь ажиллахаа больж эхэлдэг. Энэ байдал удаан үргэлжилбэл сахарын өвчин болоод таргалалтад нэрвэгдэнэ. Өглөө авсан энерги орой авсан энергиэс амархан зарцуулагддаг учир өглөө хоол сайн идэж, орой бага идвэл таргалахгүй байх боломжтой. Ажил ихтэй оройтсон байсан ч та унтахынхаа өмнө хоол идэх хэрэггүй.

 

                                     Биеийнхээ эсэд хэрэгтэйг нь л өг

 

 

 

Шөнө унтаж байхад эсийн нөхөн сэргээлт явагддаг

Шинжлэх ухааны нотолгоогоор өвчин туслаа гэдэг нь био хэмнэл алдагдсан гэсэн үг. Хэмнэл алдагдах нь амьдралын дэглэм, зөв хооллолттой холбоотой. Шөнө унтаж байхад эсийн нөхөн сэргээлт явагддаг. Эс хуваагдаж, муу эсээ устгаж, шинээр сайн эсийг төрүүлж байдаг. Шөнөжингөө ажилласан эсүүд урьд өдөр нь хүний идсэн хоолноос өөрт хэрэгтэй шим тэжээлээ аваад хэрэглэчихсэн байдаг. Эс амьд ухаантай. Өөрт хэрэгтэй гэсэн тэжээлээ л хэрэгцээтэй тоо хэмжээгээр авч хэрэглэдэг. Маргааш хэрэглэнэ гэж хэзээ ч нөөцөлдөггүй.

 

 

Иймээс өглөө босонгуут л “тэд” биднээс ажлынхаа хөлс болгож 114 төрлийн шинэ тэжээл, хоол нэхэж байгаа үед нь хэрэгтэй бодисыг нь өгч чадахгүй бол эс өвчилдөг, эсийн буруу өсөлт буюу мутаци явагддаг. Мутаци явагдсанаар хавдрын болон үрэвслийн эсүүд олноор үржиж бий болдог. Ингээд хүн өвддөг. Өглөө эсдээ хэрэгцээтэй хоол тэжээлийг нь өгч чадвал бие организм сэргэлэн цовоо, эрч хүчтэй болно. Хэрвээ өгөхгүй бол хүний бие унтаа байдалтай байдаг аж.   

 

---