Дорноговь аймгийн Хамрын хийдийн хажуу бөөрөнд Хятаын 100 хувийн хөрөнгө оруулалттай “Даблью Эс Жи Эл” компани үйл ажиллагаа явуулж эхэлсэн талаарх мэдээллийг бид өмнө нь хүргэсэн. Тэгвэл энэ асуудалтай холбоотойгоор Дорноговь аймгийн засаг дарга Т.Энхтүвшингээс албан ёсны тодруулга авлаа.

Дорноговь аймгийн засаг дарга Т.Энхтүвшин:

Хамрын хийдэд үйл ажиллагаа явуулахаар зэхэж эхэлсэн компани одоогоор уурхайн кэмпээ байгуулчихсан байна. Тиймээс аймгийн Цагдаагийн газар, Мэргэжлийн хяналтын газар очиж  шалгалт хийгээд нэгдүгээрт бичиг баримтын бүрдэл дутуу, 2-рт, орон нутгийн тусгай хэрэгцээнд авсан газарт хууль зөрчиж үйл ажиллагаа явуулж байна гэсэн шалтгаануудаар үйл ажиллагааг нь зогсоосон.

Энэ хугацаанд бид АМГТГ болон Уул уурхайн яаманд энэ лицензийг цуцлуулах хүсэлтээ хүргүүлчихээд байна.

Анх Оюу Ши Ма  гэх компани 2007 онд АМГТГ-аас хайгуулын лиценз авсан байдаг. Улмаар хайгуулаа ашиглалт болгоод өөр компанид шилжүүлэх гэх мэт процессууд үргэлжилж 2009 онд тодорхой шалтгааны улмаас зөвшөөрлийг нь цуцалсан байдаг.

Ингээд  2014 онд аймгийн ИТХ-ын шийдвэрээр тухайн бүс нутгийг орон нутгийн тусгай хамгаалалтанд авсан. Гэтэл Оюу Ши Ма гэх компани шүүхдэж дөрвөн шатны шүүхээр явсны үндсэн дээр 2018 онд лицензээ сэргээсэн юм билээ.  

Гэхдээ аймаг, орон нутгийн удирдлагууд Хамрын хийдийг ухуулахгүй гэсэн байр суурьтай байна. Учир нь Хамарын хийд бол манай аймгийн тусгай хамгаалалттай газраас гадна, байгалийн үзэсгэлэнт газар, энергийн төв гэж олон хүний сүсэглэдэг газар.

Манай аймгийн хэмжээнд ганц Хамарын хийд ч биш өөр хэд хэдэн түүх, дурсгалтай газруудад хайгуул, ашиглалтын лиценз олгосон байна. Тухайлбал, Өргөн суманд Аргалын уул гэж газарт 2014 онд Австралийн нэг компанид лиценз олгож, хайгуул хийлгэсэн байдаг.

Мөн энэ лицензийг цуцлуулах хүсэлт хүргүүлсэн ч АМГТГ-аас одоог хүртэл цуцлаагүй байна.

Айраг сумын Цагаан дэлийн агуй гэж түүх, дурсгалын өлгий болсон газар бий. Монголын хамгийн том агуй. Энэ газарт мөн л гар аргаар бичил уурхай эрхлэгчид үйл ажиллагаа явуулж, агуйн амыг эвдэж, сүйтгэж эхэлсэн. Бид улсын тусгай хамгаалалтанд авах хүсэлтээ хүргүүлсэн. Энэ хүсэлтийг Монгол Улсын Засгийн газар, УИХ руу гурав дахь удаа хүргүүлсэн. Хариу алга.

---