Дундговь болон Төв аймгуудад гахайн мялзан өвчин гарч хөл хорио тогтоожээ. Үүнтэй холбоотойгоор МХЕГ-аас Улаанбаатар хотод гахайн мах нийлүүлж буй 74 цэгээс дээж авчээ. Гурав хоногийн хугацаанд нийт 100 гаруй дээж авахад 50 хувьд мялзан өвчин илэрсэн байна. Бүр зарим ААН-үүдийн хоолны үлдэгдлээс ч илэрчээ. 

Манай улсад нийт 31 мянган гахай тоологдсоны 17 мянга нь нийслэлд байдаг. Одоогоор 130 аж ахуйн нэгжийн 17 мянган гахайг голомтын цэгт нь хориглолт тогтоож байрга ажээ.

Үүнээс гадна гахайн махны импортыг тодорхой хугацаагаар зогсоох юм байна. Эхний ээлжид гахайн мах импортлогч 10 ААН-д түгээлтээ зогсоох мэдэгдэл хүргүүлж, агуулахыг нь лацаджээ. Улаанбаатар хотын хэмжээнд агуулахад 300 тоннын нөөц, гар дээр тараагдсан 1,000 гаруй тоннын нөөц байна. Эдгээрийг устгалд оруулах юм байна.

Гахайн мялзан өвчин нь хавьтлын замаар халдварладаг, өндөр халуурал, цус төлжүүлэх эрхтний гэмтэл, уушиг, бүдүүн гэдэсний нэвчдэст үрэвсэлээр илэрдэг гоц халдварт өвчин юм. Хүн энэ өвчний тээгч учраас хүнээс мал, амьтанд халдах эрсдэл өндөртэй байдаг байна.

---