ӨМӨЗО-ы Улаанхад буюу хятадаар Чифэн хотын Нэгдүгээр ахлах сургуулийг Бээжингийн эрх баригчид салан тусгаарлах үзэл гаргасан, суртал ухуулга явуулсан гэж үзэн шалгаж эхэлжээ. Тус хотын Нэгдүгээр ахлах сургуулийн монгол хэлний ангиудад Монголын туг, далбаа өлгөсөн байсан нь эрх баригчдын ундууцлыг төрүүлжээ.

24,7 сая хүн амтай Өвөрмонгол, 21.8 сая хүн амтай Шинжиан хэзээнээсээ Бээжингийн эрх баригчдын шүдний өвчин, тусгаар тогтнолын эмзэг сэдвүүд байсаар ирсэн. Тэр дундаа ӨМӨЗО-д монгол хэл, соёл, үндэсний бүжиг, наадмаа хадгалахыг эрмэлзсээр ирсэн нь багагүй эсэргүүцэлтэй тулгардаг.

Улаанхад хотын ахлах сургуулийн сурагчид монгол хувцастай үндэсний бүжиг бүжиж, үндэсний зоог идэж хөгжилдсөн зургууд цахим ертөнцөд тархаж тэдгээрийг салан тусгаарлах үзэл сурталчилсан гэж буруутгаад байна. Хүний эрхийн байгууллагуудын мэдээлснээр тус сургуулийг мөрдөн шалгах ажил хэдий нь эхэлсэн гэжээ.

Хятадын Боловсролын товчоо, Хотын суртал ухуулга хариуцсан газар төлөөлөгчдөө илгээсэн байна. Тун удахгүй албан мэдэгдэл хийнэ гэлээ.

Ахлах сургуулийн ангиудад Монголын туг далбаанаас гадна Монголын эзэнт гүрний газрын зураг, Монголын их хаадын хөрөг зураг өлгөөтэй байсан гэжээ. Монгол хэл соёлын талаар хичээл заадаг ӨМӨЗО-ны сургуулиудад үндэсний хэв маягийг харуулсан туг далбаа өлгөх нь нийтлэг үзэгдэл гэж хүний эрхийн байгууллагууд үзэж байна. Зарим иргэд, айлууд Монголын далбааг гэртээ болон машин дээрээ байрлуулж, цахим сүлжээнд нүүр хуудсаа чимж, бие дээрээ шивүүлэх нь содон үйлдэл биш болжээ.

Хятадын блогчид цахим сүлжээнд тархсан зургуудад “хэдийгээр 56 өөр үндэстэн Хятадад байдаг ч бүгд нэг улс үндэстэн. Салан тусгаарлах үзэлтэй хэнийг ч хатуу шийтгэх хэрэгтэй” гэжээ.

 

Эх сурвалж: www.rfa.org, www.unpo.org

---