Дэлхийн эдийн засагт бүрэнхий нүүрлэж, эрсдэл нэмэгдсээр байгааг Дэлхийн банкнаас анхаарууллаа.

Тус банкнаас жил бүр танилцуулдаг эдийн засгийн үнэлгээгээр шинэ онд болон ирэх жилд эдийн засгийн өсөлт удаашрах төлөвтэй гэжээ.

 

 

Энэ онд дэлхийн эдийн засаг 2,9 хувиар өсөх бол ирэх 2020 онд 2,8 хувиар өсөх юм байна.

Үүнээс харахад эдийн засгийн  үзүүлэлт хурдацтай буурч магадгүй гэж шинжээчид дүгнэжээ.

Банкны эдийн засагчид үзүүлэлт удаанаар буурч байгаа нь сайн талтай гэж тайлбарлаж байна.

Учир нь огцом унаснаас зөөлөн газардах нь давуу талтай гэжээ.

Энэ жилийн дундаас хойш дэлхийн эдийн засгийн үзүүлэлтүүд бага багаар буурч эхлэх юм байна.

Нэн ялангуяа АНУ тэргүүтэй чинээлэг орнуудад эдийн засаг буурч, цаашлаад Европ тивийн орнууд, Япон улсад эдийн засгийн удаашрал ажиглагдана гэж таамаглажээ.

 

 

2021 онд Америкийн Ерөнхийлөгч Дональд Трамп татварыг бууруулснаар эдийн засгийн өсөлт 1,6 хувь хүртэл буурна гэлээ.

Өнгөрсөн жил Америкийн эдийн засаг 2,9 хувиар өссөн үзүүлэлттэй байсан юм.

Тэгвэл Хятадад ирэх жилүүд харьцангуй өөдрөг байх нь.

2021 он гэхэд Хятадын эдийн засаг зургаан хувиар өснө гэж тооцжээ. Энэ тоо нь 1980-2010 оны хооронд жилд 10 хувиар өсч байсантай харьцуулахад удаан боловч бусад чинээлэг орнуудаас хамаагүй өндөр үзүүлэлт юм.

Өнгөрсөн онд Хятад, Америк улсууд худалдааны дайн эхлүүлсэн нь дэлхийн эдийн засгийг маш том эрсдэлд оруулсан.

Дэлхийн нийт худалдааны 20 хувь, дотоодын нийт бүтээгдэхүүний 40 хувийг бүрдүүлж байгаа хоёр том гүрний дайсагналаас болж эрсдэл улам нэмэгдсээр байхыг эдийн засагчид сануулжээ.

 

 

Америк зээлийн хүүгээ дахин нэмбэл доллар улам хүчирхэгжсэнээр хөгжиж буй болон санхүүгийн эрсдэлтэй нөхцөл байдалд байгаа улс орнуудад хүндээр тусна.

Европын холбооноос Их Британи улс гарахдаа тохиролцолд хүрч чадахгүй бол талуудын аль аль нь багагүй гарз хохирол амсаж магадгүй юм байна.

Тэр дундаа Европтой эдийн засгийн холбоо харилцаа сайтай зүүн Европ, Хойд Африкийн улс орнууд нэрвэгдэнэ гэж Дэлхийн банкнаас үзжээ.

 

 

 

 

Эх сурвалж: www.bbc.com

---