Салхитын мөнгөний ордын хууль ёсны эзэмшигч “Жи Пи Эф” ХХК-ийн хөрөнгө оруулагч “Амин билигт” ХХК-иас мэдэгдэл гаргажээ.

Тус ордын тусгай зөвшөөрлийг “Их Монгол майнинг” ХХК-иас Г.Мөнгөншагай, Г.Жаргалан нар хуулийн дагуу “Жи Пи Эф” ХХК руугаа шилжүүлэн авсан тухай мэдэгдэлд дурдсан байна. Улмаар тус компанийн хувьцааг БНХАУ-ын “Си Си Эм Экс” ХХК худалдан авсан байдаг.

Он дамжин шүүхдэлцэж байгаагийн учиг нь “Жи Пи Эф” ХХК-ийн хувьцааг БНХАУ-ын “Си Си Эм Экс” ХХК худалдан авсантай холбоотой үүссэн билээ. Хувьцааг худалдахдаа Г.Мөнгөншагайгийн гарын үсгийг хуурамчаар үйлдсэн гэдэг нь “Амин билигт” ХХК-ийн мэдээлж байгаагаар 2017 онд тодорхой болоод байгаа гэнэ.

Товчхондоо маргааны товч түүх нь ийм.

Хоёр тал маргалдаж байх хооронд Ерөнхий сайдын үүргийн дагуу ЗГХЭГ-ын дарга Г.Занданшатар тусгай ажиллагаа явуулж, ордыг дотоодын цэргийн хамгаалалтад авсан. Өнөөдөр цацагдсан “Амин билигт” ХХК-ийн мэдэгдэлд “эрхээ сэргээлгэхээр шүүхэд хандана” гэдгээ мэдэгджээ. Эх сурвалжийн мэдээлж байгаагаар тус компани Олон улсын Арбитрын шүүх хүртэл явж заргалдах юм гэсэн.

Харин Монгол улсын Засгийн газрын байр суурь хатуу хэвээр байна. Салхитын мөнгөний ордыг дотоодын цэргээр хамгаалуулж байсан Монгол улсын Засгийн газар тус ордын тусгай зөвшөөрлийг “Эрдэнэс Монгол” ХХК руу шилжүүлсэн гэсэн мэдээлэл байна.

Үүнтэй зэрэгцээд, дараагийн орд газрыг “булаан” авах ажиллагааг Ерөнхий сайд У.Хүрэлсүх өөрөө удирдан явна гэсэн мэдээлэл тархаад байна. Төрийн мэдэлд авах дараагийн ордоор Ховд аймгийн Цагаан эрэгийн орд газар гэсэн таамаг байна.

Цагаан эрэгийн гянтболд /вольфрром/-ын ордод үйл ажиллагаа явуулж байсан “Ашид Алтай майнинг” болон “Өгөөжтэй өв” ХХК-иудтай холбоотой хууль бус үйл ажиллагаа, хангалтгүй хийгдсэн нөхөн сэргээлтийн асуудал сөхөгдөөд байгаа юм.

---