Нийтийн тээврийн төлбөрийн систем цахимд шилжсэн ч зорчигчид төдийлөн дадаж хэвшихгүй байсаар байна. Автобусанд бэлэн мөнгөний хайрцаг байрлуулсан  хүмүүс мөнгөн дэвсгэртийг голоор нь хуваан хийж зөрчил гаргаад байсан тул зөвхөн картаар зорчих шаардлага тавьсан.

Гэвч карт цэнэглэх цэг хотын дунд хүрэлцээгүйн улмаас иргэд жолооч нарт бэлэн мөнгө өгснөөс үүдэж нийтийн тээврийн орлогоос төсөвт төвлөрөх мөнгө багассан гэнэ. Албаны эх сурвалжийн ярьж буйгаар бол нэг жолооч дунджаар 30-40 мянган төгрөг авдаг аж. Тиймээс карт цэнэглэх цэгийн тоог олшруулж, төсвийн орлогоо алдахгүй байх арга хэмжээ авахаар төлөвлөн цэнэглэх цэгүүдийг автобусны буудал болгонд байрлуулахаар болжээ.

Зөвхөн төлбөрийн карт л худалдах цэгүүдэд лед дэлгэц суурилуулан аль чиглэлийн автобус хаана явж байгааг мэдээлэхээс гадна хяналтын камер байрлуулж, зогсоолыг хянах аж. Ингэснээр хулгайн хэрэг буурч, хувийн халтуур хийдэг такси автобусны буудал дээр зогсох зөрчил багасах юм.  

 

---