Улс төр, нийгэм, эдийн засгийн бүхий л салбарт эмэгтэйчүүд, хүүхэд, гэр бүлийн эрх ашгийг хамгаалах зорилгоор, тэдний дуу хоолой болж үйл ажиллагаагаа явуулж ирсэн Монголын Эмэгтэйчүүдийн Холбоо нь 94 жилийн түүхтэй, иргэний нийгмийн бие даасан томоохон байгууллага юм.

 

 

Охид эмэгтэйчүүдийн хүсэл зорилго, санал санаачилгыг дэмжиж, бодлогын түвшинд хэрэгжүүлэхэд гүүр нь болж ажилладаг тус байгууллагын Ховд аймаг дахь салбар зөвлөл “Эмэгтэйчүүдийн хөгжлийн төв”-ийн байртай болж, албан ёсоор үйл ажиллагаагаа эхлүүллээ. Энэ үеэр аймгийн удирдлагууд нээлтийн арга хэмжээнд оролцон “Эмэгтэйчүүдийн хөгжлийн төв”-ийн дэргэд “Хүчирхийлэлд өртсөн хүүхэд, эмэгтэйчүүдийг хамгаалах байр”-ыг барихаар төлөвлөн ажиллаж буйгаа хэлсэн юм.

 

 

Тус салбар зөвлөл Хөгжлийн төвийн байртай болж, ажлын алба байгуулан ажилласнаар 17 сумын салбар зөвлөлийнхөө үйл ажиллагааг идэвхжүүлэх, нийгэм дэх байр сууриа бэхжүүлэн, охид, эмэгтэйчүүдэд чиглэсэн үйл ажиллагааг саадгүй явуулах боломж бүрдэж буйг МЭХ-ны шат шатны удирдлагууд онцлон хэллээ.

---