™ watch
™ watch
Цус сэлбэлт судлалын үндэсний төвөөс сар бүрийн гуравны өдрийг “Цусаа бэлэглэх өдөр” болгон тэмдэглэдэг уламжлалтай. 2015 оны дөрөвдүгээр сараас эхлэн тус өдрийг тэмдэглэсэн бөгөөд нийт 45 удаа зохион байгуулжээ.
Энэхүү өдрийн хүрээнд цусны донорын эгнээг өргөжүүлэх, тэднийг алдаршуулах зорилгоор жил бүрийн нэгдүгээр сарын гуравны өдрийг Үндэсний “цусны донорын баярын өдөр” болгосноос хойш энэ жил дөрөв дэх удаагаа тэмдэглэн өнгөрүүлж байна. Энэ хүрээнд ЦССҮТ нь JCI капитал байгууллагатай цусны донорын эгнээг өргөжүүлэх, донорын үйлсийг олон нийтэд сурталчлах чиглэлээр хамран ажиллах гэрээнд гарын үсэг зурлаа.
ЦССҮТ-ийн захирал анагаах ухааны доктор Н.Эрдэнэбаяр
“JCI капитал байгууллагатай цусны донорыг өргөжүүлэх чиглэлээр 2009 оноос хойш 10 дахь жилдээ хамтран ажиллаж байна. Сүүлийн дөрвөн жилийн хугацаанд цусны донорын тоо 70 хувиар өссөн. Өнгөрсөн онд Улаанбаатар хотын хэмжээнд 26050 донор цусаа бэлэглэсэн. Хүмүүс цусаа бэлэглэснээр гурван хүний амь насыг авардаг. Учир нь нэг хүний цуснаас гурван төрлийн бүтээгдэхүүн хийдэг. Тухайн өвчтөнд ямар бүтээгдэхүүн шаардлагатай байна түүнийг нь боловсруулдаг. ЦССҮТ нь эрүүл мэндийн байгууллагуудаас хамгийн анхны олон улсын стандартыг хэрэгжүүлж байгаа. Энэ онд бид бүхэн Монгол улсад анх удаа Азийн цус сэлбэх холбооны 15-р уулзалт хэлэлцүүлгийг зохион байгуулах эрхийг авч, бэлтгэл ажлаа хийж байна. ” хэмээн онцоллоо.
“Цусны донорын баярын өдөр”-ийн хүрээнд тогтмол хугацаанд цусаа бэлэглэж байгаа 70-аас дээш өгөлттэй нэг донорыг “хүрэл донор” 100-аас дээш өгөлттэй донорыг “мөнгөн донор”, 150-аас дээш өгөлттэй нэг донорыг “алтан донор”-оор тус тус өргөмжилж алдаршуулав.
Хүндэт донор Х.Төмөрсүх “Би 1984 оноос хойш 100 удаа цусаа бэлэглэсэн. Монголын донорын холбооны гишүүнээр ажилладаг. Манай холбоо 2000 оноос хойш үйл ажиллагаагаа явуулж байна. Өнөөдөр “мөнгөн донор” хэмээх шагналыг авсандаа маш их баяртай байна. Цусаа бэлэглэснээр хүмүүст амьдрал бэлэглэж буй гэгээн үйлс юм” гэв.
Сурвалжлагч Д.Болор-Эрдэнэ
