Улаанбаатар хотын утаа ихтэй дүүргүүдийн эмнэлэг ачаалалтай ажиллаж буй. Нийслэлийн хэмжээнд хүүхдийн амьсгалын замын өвчлөл ихэсч, эмнэлгүүдийн ачаалал хэрээс хэтэрчээ. Тэднээс Хан-Уул дүүргийн эмнэлгийн хүүхдийн тасагт одоогоор 165 хүүхэд хэвтэн эмчлүүлж байна. Гэтэл тус эмнэлэг хүүхдийн 80 ортой. Тиймээс нэмэлтээр ор дэлгэн, заримыг нь коридорт хүлээн авч эхэлжээ. Нэмэлтээр дэлгэсэн орны насанд хүрэгчдийн дотрын тасагт 50, хүүхдийн тасгийн өрөөний зориулалтыг өөрчилж 20 ор тавьж, үлдсэн эвхдэг 15 орыг эмнэлгийн коридорт байрлуулжээ.

 

 

Нэг тасагт л гэхэд 2-9 хүүхэд хэвтэн эмчлүүлж байгаагаас ихэнх нь бага насны тэр дундаа нярай хүүхдүүд эзэлж байгаа аж. Тус эмнэлэг ачаалал ихтэй ажиллаж байгаа тул ханиад нь хөнгөн хэлбэрийн байдалтай бол 5 хоног, хатгаа болон хавсарсан халдвартай хүндэрсэн тохиолдолд 8 хоног хэвтүүлэн эмчилж буй. Тухайлбал, өнгөрсөн ням гарагт буюу 12 сарын 30-нд 119 хүүхэд үзүүлснээс 10 хүүхэд зайлшгүй хэвтэн эмчлүүлэх шаардлагатай байсан тул хүүхдийн тасаг руу шилжүүлжээ.

 

 

Ачаалал ихэсдэг амралтын ѳдрүүдэд дөрвөн хүүхдийн эмч, таван сувилагч байгаа ч хүүхэд бүрт хүрэлцэхгүй  тул тэтгэвэрт гарсан туршлагатай ахмад эмч, мөн ѳрхийн эмнэлгийн эмч нараа хүлээн авах дээр хүч нэмэгдүүлэн ажиллуулж байна. Ханиад томуу их байгаа болохоор эмнэлгийн цонхнуудын дулаан алдалтыг зогсоох, халуун усгүй ѳрѳѳнүүдийн крантыг засах, хүлээн авахын гаднах хаягт гэрэлтүүлэг хийх, агаар шүүгчдээ асаалттай байлган дээр байрлуулах, 7-9 хүүхэдтэй тасгуудад ариутгал цэвэрлэгээ хийх зэргээр үүрэг шаардлага өгсний дагуу эмнэлгийн ажилтнууд амрах завгүй ажиллаж байна.  

 

 

Дүүргийн эрүүл мэндийн төвүүд “Хүүхдийн кабинет”-ийг ажлын өдрүүдэд 17:00-22:00 цаг хүртэл, бямба гарагт 10:00-16:00 цаг хүртэл уртасгасан цагаар, мөн томуу, томуу төст өвчний зөвлөгөө өгөх утас ажиллуулж байна. Түүнчлэн ӨЭМТ-ийн гэрийн эргэлт үзлэгийг идэвхижүүлжээ.

---