Мэргэжлийн боксын домогт аварга Мэнни Пакьяо 2016 оны 5 сард Филиппин улсын 16 сая гаруй сонгогчдын саналаар сенатын гишүүнээр сонгогдон ажиллаж байгаа билээ. Өдгөө 40 настай сенатын гишүүн маань мэргэжлийн рингэндээ хүч үзсээр байгаа юм. Тухайлбал энэ оны 7 сард Аргентин улсын шилдэг боксчин Лукас Мартин Мафисстэй тулалдан долоодугаар үе дээр хүнд цохилтоор буулган авсан юм. 

Харин ирэх оны 1 сарын 19 өдөр эрхэм сенатын гишүүн маань нийт 36 тулаан хийж 33 ялсан үзүүлэлтэй АНУ-ын хүчирхэг боксчин Адриен Бронертэй тулалдах хуваарьтай байна. Америк боксчны хувьд энэ жил 29 настай бол Филлипин сенатын гишүүний хувьд 40 настай гэхээр хоорондын насны зөрүү нилээдгүй их байгаа юм. 

 

Хоёр боксчны тулалдах АНУ-ын Лас Вегас хотын Grand Garden Arena нь Мэннигийн хувьд их "дурсамжтай" газар байх нь дамжиггүй. Учир нь яг энэ танхимд 2015 онд домогт боксчин Мэйвийдертэй тулалдсан зууны тулаанд ялагдаж байсан. Хамгийн сүүлд буюу хоёр жилийн өмнө мөн л энэ танхимдаа Тимоты Брадлэйтэй тулалдан ялж байсан юм. 

Энэхүү тулаан зөвхөн бокс сонирхогчдын төдийгүй спорт сонирхогч хэн бүхний анхаарлын төвд байна. www.livetv.mn сайт тун удахгүй "Спортын домгууд" буландаа Филлипин улсын домогт тулаанч, сенатын гишүүний талаар дэлгэрэнгүй нийтлэх болно.  

Аргентин улсын шилдэг боксчин Лукас Мартин Мафисстэй тулалдан долоодугаар үе дээр хүнд цохилтоор буулган авсан тулааны бичлэг бүрэн эхээр нь хүргэж байна:

---