Эрх чөлөөтэй байхын урлаг буюу шинэ ном. Л.Өлзийтөгс зохиолчийн шүлгүүдэд хийсвэр сэтгэлгээнээс гадна, амьгүй зүйлийг амьтай бодитой болгох шид, үзэгдэл юмсын өнгө будгийг олж харах чадвар, эрэл хайгуул илхэн харагдана. Мөн уламжлалаас татгалзсан содон сонин зүйрлэл, тодотгол, адилтгал олонтаа. 

 

 

ГУЙЛТ

Чамайг эзгүйд би дандаа даардаг
Чамайг эзгүйд би дандаа айдаг 
Миний төлөө гадагш гарах бүрийд чинь 
Чиний өмнөөс даарч, өчнөөн ядардаг
Өөрийн гараар ургуулсан цэцэгсийнхээ үнэрт, харуулдан 

Өдөржин би нартай цонхон дээр суувч 
Эргэж ирэхээс чинь нааш гар минь ер бүлээцдэггүй 
Энгэрт чинь наалдахаас нааш зүрхний минь цохилт жигдэрдэггүй 
Чиний эзгүйд цаг хүртэл зогсчихоод 
Миний цэцэгсийн ургах чимээ ч сонстдоггүй 
Гараад л ирэхийн зуурт чинь мянган жил өнгөрөх шиг 
Галзуурмаар их харанхуйд зуун жил болчих шиг 
Хөлийн чинь чимээг сонсохоос нааш амьдрал над руу ирдэггүй 
Хөгширч орхидог оо би, түргэн наддаа ирээрэй

 

 

---