Хоёр жилийн өмнө гарсан Марвелийн “Дийлдэшгүй Төмөр хүн” цувралд Тони Старк суут инженер Рири Уилямстай уулздаг. Өсвөр насны өнгөт арьстай бяцхан охин биендээ баймгүй гайхалтай инженерийн ухаантай бөгөөд Төмөр хүний хуягийг засдаг. Рири охин өөрийн гэсэн шүтэн бишрэгчидтэй болж “Төмөр зүрхтэн” супер баатрын нэрээр дахин гарч ирлээ. Марвель Төмөр зүрхтэй өсвөр насны охины шинэ цувралыг гаргахаа мэдэгдсэн байна.

Эхний цуврал 11 дүгээр сарын долоонд уншигчдад хүрнэ. Сонирхолтой нь өнгөт арьстай охины гайхамшигт түүхийг Чикагогийн нийгэм судлаач, зохиолч Эв Эвинг бичихээр болжээ. Эв Эвинг ч мөн өнгөт арьстай бөгөөд уран бүтээлч Кевин Либрандтай хамт төсөл дээр ажиллаж байна. Эвинг нь “Цахилгаан харваачид” яруу найргийн номын зохиолч төдийгүй нийгмийн ухаан судлалын профессор. Твиттерт олны танил бөгөөд өнгөт арьстай охины гайхамшигт түүхийг өнгөт арьстай эмэгтэй бичихээр болсноо мэдэгдэхэд 11,000 хүн ханджээ.

Эх сурвалж: /www.qz.com/ 

---