Манай дэлхийг өдөр нь нар гийгүүлж, шөнө нь сар гийгүүлдэг. Хэмжээ хязгаар нь үл мэдэгдэх уудам огторгуй ертөнцөд дэлхийгээс өөр хүн амьдарч болохуйц гариг эрхэс байдаг гэдэгт олон хүн итгэж ирсэн. Дэлхийн дагуул сарны гадаргуу дээр мөс байдаг эсэх нь олон арван жилийн турш ээдрээтэй, тодорхойгүй сэдэв байсан юм. Тэгвэл одон орон судлаачид энэ таамгийг батлахын тулд шаргуу хөдөлмөрлөж нотлох баримт олжээ.

АНУ-ын Хавайн Их Сургуулийн судлаачдаар удирдуулсан эрдэмтдийн баг сарны гадаргуу дээр хөлдсөн хэлбэртэй ус байгааг олж илрүүлсэн байна. Энэ нотолгоог арван жилийн өмнө сар луу ниссэн сарны эрдэс бүтцийг судлан газрын зураг зурах зорилготой “НАСА”-ын төхөөрөмж олжээ.

Олдсон нотолгоог эрдэмтэд дахин судалж үзсэний дүнд сарны өмнө ба умард туйлд байдаг галт уулын тогооноос олдсон зүйл гадаргын чулуутай хамт наалдаж хөлдсөн мөсний хэлтэрхий мөн гэдгийг баталсан.

 Хэрэв сарны гадаргууд мөс байгаа бол сарны гүнийг ухахад бүр их хэмжээний мөс агуулагдаж байж болохыг эрдэмтэд хэлж байна.  Мөн мөсний химийн нэгдэл, тоос, чулуутай холилдон саран дээр галт уулын тогоо үүсч, сарнаас бүрэнхий туяа ялгардаг гэжээ.

Хэдийгээр саран дээрээс мөс олсон ч энэ мөс хаанаас үүссэнийг одоогоор нотлоогүй байна. Манай дэлхий дээрх чандмань эрдэнэ ус амьдрал бий болгосон гэж үздэг. Хэрэв саран дээр ус байгаа нь нотлогдвол сарны шинэ бааз барих болон сансар огторгуйн судалгааны ажилд ихээхэн хувь нэмэр болно гэж Хавайн Их Сургуулийн судлаачид хэлжээ.

Эх сурвалж: /www.qz.com/

---