Европын холбооны гишүүн 28 орон хуванцар соруул, аяга таваг, халбага сэрээ, хутга зэргийг хэрэглээнээс хасахаар зөвшилцсөн байна. 2021 он гэхэд буюу ирэх гурван жилийн дотор холбооны гишүүн орнууд үүрэг даалгавраа биелүүлж эдгээрийг хэрэглээнээс хасна гэжээ.

Хуванцар хог хаягдал байгаль орчинд маш том хор хөнөөл учруулж байгаа тул дэлхийн нийтээрээ энэ төрлийн хэрэглээнээс татгалзахыг уриалсаар ирсэн. Европын өндөр хөгжилтэй орнууд албан ёсоор нэгдэж байгаль орчинд халтай хог хаягдлаас сэрэмжлэх томоохон алхам хийлээ.

Дахин ашиглах боломжгүй нэг удаагийн хоолны сав, аяга, үлээдэг бөмбөлөг, нойтон салфетка, гялгар уут зэргийг үйлдвэрлэдэг Европын компаниудын үйл ажиллагааг хязгаарлана.

 

 

Далай тэнгисийн гүнд хуримтлагдаж буй хуванцар хаягдал хүн төрөлхтний хүнсний аюулгүй байдалд халдаж байгааг Европын зөвлөл анхаарууллаа. Таны өнөөдөр хэрэглээд хаясан гялгар уут, хуванцар хаягдал далайн гүнд очиж, түүгээр хооллосон загас таны зоогийн ширээнд ирж болзошгүй гэдгийг сануулж байна.

 

Эх сурвалж: www.qz.com

---