Шинэ жил, зул сарын баярын өдрүүд амттай сайхан зоогийн ширээ, сэтгэл догдлуулсан бэлэг, халуун дотно гэр бүлийн уулзалтаар төсөөлөгддөг. Гэсэн хэдий ч эдгээр өдрүүдэд зүрхний шигдээсээр өвчлөх магадлал эрс нэмэгддэг гэдгийг та мэдэх үү?

Швед улсын эрүүл мэндийн газрын судлаачид бүх нийтийн баярын өдрүүд, спортын арга хэмжээний үеэр зүрхний шигдээсээр өвчлөх тохиолдол хэрхэн нэмэгддэг болохыг судалжээ. Ингэхдээ 15 жилийн турш зүрхний шигдээсээр өвдсөн 300,000 орчим тохиолдлыг нягтлан шалгасан байна.

Судалгааны дүнд зул сар, шинэ жилийн баярын өдрүүдэд иргэд зүрхний шигдээс өвчин хамгийн их тусч байжээ. Зул сарын баярын өдөр 15 хувиар, зул сарын баярын өмнөх өдөр 37 хувиар зүрхний шигдээс өвчний тохиолдол нэмэгдсэн байна.

Нэн ялангуяа баярын өмнөх орой 22 цагт хамгийн аюултай тул өндөр настан, бие султай найз нөхөд, төрөл садандаа анхаарал халамж тавьж тайвшруулахыг эмч мэргэжилтнүүд зөвлөжээ.

Мөн зүрхний шигдээсийн өвчлөл шинэ оны эхний өдөр 20 хувиар, зуны амралтын үед 12 хувиар нэмэгдсэнийг тогтоожээ. Энэ нь аливаа амралт зугаалгын өмнө хүмүүс аяллын тасалбар худалдаж авах, бараг уулздаггүй төрөл садантайгаа уулзах, зоогийн ширээ бэлдэх зэргээс үүдэн стрессддэгтэй холбоотой байж магадгүй гэж үзжээ.

 

Эх сурвалж: www.rt.com

---