АНУ-ын Засгийн газар Умард Солонгосын өндөр дээд албан тушаалтай гурван хүний эсрэг хориг тавьсанд Пхеньяны зүгээс шүүмжлэн буруутгаж байгаагаа илэрхийллээ. Америкийн шинээр тавьсан хориг Солонгосын хойгийг цөмийн зэвсэггүйжүүлэх хөтөлбөрийг бүрмөсөн зогсоож болзошгүй гэдгийг Умардын тал анхааруулжээ.

Төрийн департаментын хэвлэлийн төлөөлөгч Роберт Паладиногийн мэдэгдсэнээр “Умард Солонгос улсад хүний эрх зөрчигдсөөр байна. Шударга бус шүүхээр яллаж амь насыг нь хороох, албадан хөдөлмөр эрхлэх, баривчлан хорих, хүчирхийлэх, албадан үр хөндүүлэх зэрэг хүчирхийллээр тус улс дээгүүрт орсоор байна” гэжээ.

 

 

Тиймээс АНУ удирдагч Ким Жон Уны баруун гарын туслах Чое Рён Хэ, Аюулгүйн албаны сайд Жон Кён Тэк, суртал ухуулгын алба хариуцсан Пак Кван Хо нарын хөрөнгийг царцаах шийдвэр гаргасан байна.

Харин Умард Солонгосын тал уг хоригийг цочирдон хүлээж авч, дургүйцэж байгаагаа илэрхийлсэн юм. Төрийн мэдлийн сувгаараа дамжуулан “Вашингтоны энэ үйлдэл өнгөрсөн жилийн дайсагнасан харилцааг эргэн сэргээж байна” гэжээ.

Өнгөрсөн жил Ерөнхийлөгч Трамп Ким Жон Уныг “бяцхан пуужин залуу” хэмээн хошигносноор хоёр улсын харилцаа хурцдаад байсан юм. Гэхдээ энэ жилийн зун Сингапур улсад болсон Трамп, Ун нарын түүхэн уулзалтаас хойш Солонгосын хойгийг цөмийн зэвсэггүйжүүлэх хөтөлбөр хэрэгжих замдаа орсон. Шинэ он гарангуут хоёр дахь удаагийн уулзалт болно гэдгийг Трамп мэдэгдээд байсан юм.

 

Эх сурвалж: www.bbc.com

---