Эмнэлэгт үзүүлэхээр ирж байгаа хүүхдүүдийн дийлэх нь хатгаа туссан байдалтай ирж байна хэмээн Сүхбаатар дүүргийн Хүүхдийн тасгийн эмч мэргэжилтнүүд дурдлаа

Манай улсад өнөөдрийн байдлаар агаарын бохирдол, ханиад томуу гамшгийн хэмжээнд хүрээд байна. Дүүргийн хүүхдийн эмнэлэгүүд ажлын өдөр 22.00 цаг хүртэл, бямба гаригт 10:00-16:00 цагийн хооронд үзлэг хийж байгаа ч ачаалалаа дийлэхгүй байгаа юм. Эмнэлэгт үзүүлэхээр ирж байгаа хүүхдүүдийн дийлэх нь хатгаа туссан байдалтай ирж байна хэмээн Сүхбаатар дүүргийн Хүүхдийн тасгийн эмч мэргэжилтнүүд дурдлаа. Нэгэнт хүндрээд ирсэн хүүхдүүдэд  антибиотек бичиж өгөхөөс аргагүй байгааг эмч нар учирласан юм. Дүүргийн эмнэлгүүд арай хөнгөн хөнгөн өвдсөн хүүхдүүдийг гурав, хатгаа авсныг тав хонуулаад гаргаж байгаа аж.

Нийслэл хотод томуугийн эсрэг вакцин тарьж байгаа ч ханиад тусаагүй хүнд тарих ёстой гэнэ. Зарим хүүхдүүдийн хувьд ханиадаасаа салж чадаагүй байтал дахин өөр нэг вирусээр өвчлөн ханиадаа хүндрүүлэх тохилдол их байдаг ажээ. Томуу, томуу төст өвчин хүндрэхээс гадна агаарын бохирдол нь амьсгалын замыг тэр чигээр нь дарангуйлж байна.

Улсын хэмжээнд нийт хэвтүүлэн эмчлэх 22 мянган ор байдгаас 2500 нь хүүхдийн ор гэнэ. Тэдгээрээс нийслэлийн хэмжээнд 977 хүүхдийн ор байгаа ч томуу, томуу төст өвчний ид дэгдэлтийн үед энэ нь хүрэлцдэггүй байна. Тиймээс энэ жил 850 ор нэмэлтээр гаргах ажлыг зохион байгуулан ажиллаж байгаа гэнэ.

Эцэг, эхчүүд олон нийтийн газарт хүүхдээ дагуулж явахгүй, дааруулахгүй байх, дархлааг нь дэмжих амин дэмээр баялаг хоол хүнс хэрэглэхийг холбогдох албанаас зөвлөж байна.

---